-Almmuhus-
KULTUVRALullisámi taleanta juoigá Telemárkkufestivála rahpamis

Lullisámi taleanta juoigá Telemárkkufestivála rahpamis

Journalista

-

-

Lullisámi nuorra taleanta čuojaha Telemárkkufestiválas boahtte čavčča.

Nuorra juoigi Hedemárkkus eret, Marja Helena Fjellheim Mortensson, bođii oidnosii maŋŋel Riddu Riđu go lei «Nuorra dáiddár» 2014. Sus lea erenoamáš jietna, son buktá lagasvuođa ja dovdá bures iežas sámi árbbi maid son roahkkadit ovdanbuktá, čállá Telemárkkufestivála preassadieđáhusas.

Lávlagat maid ovdanbuktá leat lagasvuođa birra lundui, boraspirepolitihkkii, boazoealáhusa rahčamušat ja sámi giela birra.

 

Čuojahan máilmmi eamiálbmogiidda

Marja Helena lea maid čuojahan Majestehtalaš Gonagassii ja Sámediggái. 2014 čavčča juoiggai son máilmmi eamiálbmogiidda go juoiggai Migration Music Festiválas Taipeias Taiwanis.

Su mielde čuojaheaba Georg Buljo ja Mattis Kleppen geat ráhkadeaba Mortenssonii čáppa ja čuohccis jietnagova Lullisámi luđiin mii lea váldooassi ovttas ođđaáigásaš sámi ovdanbuktin.

 

Telemárkkufestivála lágiduvvo borgemánu 18.-21.beivviid Bø Telemárkkus. Rahpandoalut leat duorastaga ja maŋŋel rahpama čuojaha Marja Helena Fjellheim Mortensson. Bearjadaga beaivet lea sus maid konsearta ovttas Joriin.

-Almmuhus-