Lujávrri suohkanis Guoládatnjárggas Ruošša beale Sámis dain vahkkuin ávvudedje ja galgat vel čalmmustahtit stuorra dáhpáhusaid.
Lujávrri suohkanis Guoládatnjárggas Ruošša beale Sámis dain vahkkuin ávvudedje ja galgat vel čalmmustahtit stuorra dáhpáhusaid.
Lujávrri suohkana aviisa “Lovozerskaja pravda” 7 beaivvi skábmamánu ávvuda iežas 80 jagi vuođđudeami rájes.
Vuosttáš gearddi aviisa lei deaddiluvvon 7 beaivvi skábmamánu 1935 jagis. “Lovozerskaja pravda” dahje “Lujávrilaš duohta” almmuhuvvo oktii vahkus. Lujávri suohkan lea aviissa vuođđudeaddji. Otná beaivvi mielde aviissa deaddilanlohku lea 850 eksempelára. Ruoššagiella lea váldogiela aviissas. Aviisa lea vejolaš lohkat sihke PDF- ja bábirhámiin.
Dás oainnát aviissa váldosiiddu oasi.
Maiddái mannan vahkkoloahpa Lujávrri gili vuosttáš skuvla lei stuorat doaluin ávvudan iežas 125 riegádanbeaivvi.
– 1890 jagis Lujávrris vuođđudedje gili vuosttáš skuvlla. Maŋŋelaš ásahedje vel nuppi skuvlla muhto áiggi mielde dáid dahke oktan skuvlan. Muhto juste 1890 jagis vuosttaš luohkái álge 8 bártni ja 5 nieidda. “Geafivuođa” geažil 1 bárdni ja 3 nieidda šadde johtilit loahpahit iežaset oahpu skuvllas, čállá skuvla iežas neahttasiiddus.
Odne skuvlla vázzet 248 oahppi.
Dakkár viesus lei Lujávrri suohkana vuosttáš skuvla. Govven: Lujávrri skuvla.
Ávvudoalut ledje Lujávrri suohkana kulturviesus 30 beaivvi golggotmánus.
