Dovddus Norgga artista lea ráhkadan lávlaga «Fahrenhaidt» joavkkuin, ja lea seaguhan luohteoasáža musihkkii maid Elle Márjá Eira juoigá.
Dovddus Norgga artista lea ráhkadan lávlaga «Fahrenhaidt» joavkkuin, ja lea seaguhan luohteoasáža musihkkii maid Elle Márjá Eira juoigá.
«Fahrenhaidt» Duiska musihkkajoavku lea almmuhan skearru mas guosselávlut leat mielde. Ovtta lávlagis, «Kingdom of Light» mas Norgga artista Margaret Berger lea váldolávlu, lea maid sámi artista Elle Márjá Eira mielde juoigame.
Margaret Berger lea čállán lávlaga, ja «Fahrenhaidt» lea ráhkadan musihka skearrus mii almmuhuvvui čakčamánu 9.beaivvi. «Fahrenhaidt» ráhkada pop-musihka ja joavkkus leat guokte miellahtu, Erik Macholl ja Andreas John.
Gálggai hástalusa
– Mari Boine ávžžuhii Universal Music váldit muinna oktavuođa go ledje ohcame sámi juoigi, muitala Elle Márjá Eira gii lea jođus Murmánskii dál konseartta čuojahit go Ávvir riŋge.
– «Fahrenhaidtas» lei luohttámuš ahte mun ieš nagodan gálgat hástalusa. Mun lean bádden jietnafiillaid dáppe ruovttubáikkis ja sádden daid sidjiide. Dán áiggi lea vejolaš bargat dakkár bargguid neahta bokte, muitala Elle Márjá Eira.
Musihkkavideo almmuhuvvo
Lávlagii almmuhuvvo musihkkavideo fargga. Eira lea dasa ožžon veahki Andreas Auslandas filbmemii ja Hans Idar Haldorsen gii lea filbmen dronain oasážiid musihkkavideoi maid «Fahrenhaidt» áigu almmuhit.
– «Fahrenhaidt» háliidedje ahte mun galgen dáppe davvin filbmet. In jáhke gal earáid vel fuomášan ahte lean searvan ovtta lávlagii, ja fuomášin ieš ahte skearru lei jo almmuhuvvon, boagusta Elle Márjá Eira.
Guldal «Fahrenhaidt» lávlaga «Kingdom of Light» mas Margaret Berger lávlu ja Elle Márjá Eira juoigá.
