-Almmuhus-
-Almmuhus-
KULTUVRALuđiin geahčča­laddaba ođđa musihkka­hámiid: – Ilus viiddidit rájiid

Luđiin geahčča­laddaba ođđa musihkka­hámiid: – Ilus viiddidit rájiid

-

-

Ole-Henrik ja Markus almmuheaba iežaska vuosttaš EP-skearru bearjadaga. Seammás máinnusteaba iežaska vuosttaš albuma mii gárvána boahtte jagi.

Ole-Henrik Bjørkmo Lifjell ja Markus Johnsen Thonhaugen, geat leaba eret Hemnes gielddas Helgelánddas Nordlándda fylkkas, leaba oanehis áiggis vásihan ollu, čálliba soai preassadieđáhusas.

Lea vássán badjelaš jahki das rájes go soai almmuheigga sudno vuosttaš lávlaga, «Ráhkisvuohta». Das rájes leat leamašan sudnos moanat čuojahanbarggu. Mannan geasi čuojaheigga seammá lávddis Oslos go eará beakkán sámi artisttat, nu go Marja Mortensson ja Keino. Gieskat čuojaheigga soai vuosttaš geardde Muofis, Rana Pride doaluid oktavuođas.

Bearjadaga ilbmá sudno vuosttaš EP man namma lea «Leam Dihte» man bokte soai muitaleaba doaivaga birra. 

– Lea ollu mii dáhpáhuvvá dáid áiggiid.  Váldošuokŋa muitala ahte loahpas dat manná bures, lohká Ole-Henrik, gii lávlu preassadieđáhusas.

LUOĐI OĐĐAMÁLLET VUOGIS: – Jus luohti galgá ceavzit, de lea dehálaš ahte dat biddjo dan áigái mas mii eallit. Preassagovva.
LUOĐI OĐĐAMÁLLET VUOGIS: – Jus luohti galgá ceavzit, de lea dehálaš ahte dat biddjo dan áigái mas mii eallit. Preassagovva.

 Vuolidit leavttu

Markus doapmá lasihastit ahte dás ii leat dušše sáhkan dán erenoamáš jagi birra mas korona njoammudávda stivre olbmo eallima.  Nuorat dovdet maid noađđin álo leat čeahpimusaid gaskkas sihke barggus, oahpus ja astoáiggis. 

– Dán šuoŋas letne dihtomielalaččat válljen vuolidit leavttu juoga maid buohkat muđuid berrejit dahkat eallimis.  Mii leat doarvái buorit nu go mii leat.

Luohti ja electronica

Dát guovttis leaba alo eksperimenteren musihkain mas luohti lea leamašan sudno vuolggasadji.

– Jus luohti galgá ceavzit, de lea dehálaš ahte dat biddjo dan áigái mas mii eallit, oaivvildeaba soai. Danin gávdnaba soai maid inspirašuvnna ollu eará guovlluin.

– Housemusihka gietkamis Chicagos gitta tekno musihka vuolggasadjái Berlinas. Luođis lea stuorra fápmu ja moai oaivvildetne čielgasit ahte dan mielde maid sáhttá dánsut.  Nu soai, Markus ja Ole-Henrik, oaivvildeaba.

EP, mii fargga ilbmá, sisdoallá guokte bihttá.  Lea maid vuosttaš geardde ahte Lulli-Sámi luohti biddjo trap-musihka oktavuhtii mii ovdánii Amerihkás 1990-logus, ja LoFi.

– LoFi lea hui miellagiddevaš suorgi mii árbevirolaččat ii geavahan daid buoremus biergasiid dáiddalaš buvttadeamis. Nu go mun dieđán, de ii leat goassige ovdal buvttaduvvon «Lulli-Sámi LoFi».

– Moai letne ilus go besse viiddidit rájiid, lasihastá Ole-Henrik.

DJ IJA SKEARRU OLGGOŠ: Preassagovva.
DJ IJA SKEARRU OLGGOŠ: Preassagovva.

Ođđa albuma boahtte jagi

Soai lohpideaba eanet almmuhemiid boahtte jagi. Almmuheamit mat lea maŋŋonan korona njoammudávdda dihte.

– Plána lei almmuhit eanet lávlagiid dán jagi, muhto korona njoammudávda bissehii buot.  Dat lea mielddisbuktán ahte moai letne vuđoleappot beassan bargat musihkain, lohká Markus. 

Soai almmustahttiba ahte leababargamin ođđa albumiin.   Albuma ilbmá lagabuidda 2021 geasi.

– Dasa moai hirbmadit illudetne, lohká Ole-Henrik vel preassadieđáhusas.  

«Leam Dihte»:

Lulli-Sámi electronica-EP mas leat guokte lávlaga. 

Almmuheaddji lea DAT golggotmánu 23. beaivve.

Guhkkodat:  8 minuhta ja 4 sekundda.

Buvttadeaddjit:  Markus Johnsen Thonhaugen ja Ole-Henrik Lifjell gii lávlu.

Nordlándda fylka lea ruđalaččat dorjon dán barggu.

Gáldu: Preassadieđáhus DJ Idja

-Almmuhus-