NRK preassaovddasvástideaddji Maria Stangeland dieđiha ahte ođđajagemánu 14. beaivvi álggahuvvo ođđa prográmmaráidu NRK:s, «Muitte mu – Husk meg!». Prográmmas galget guđas ráhkadit luođi olbmuide geat mearkkašit ollu sidjiide.
NRK preassaovddasvástideaddji Maria Stangeland dieđiha ahte ođđajagemánu 14. beaivvi álggahuvvo ođđa prográmmaráidu NRK:s, «Muitte mu – Husk meg!». Prográmmas galget guđas ráhkadit luođi olbmuide geat mearkkašit ollu sidjiide.
«Muitte mu – Husk meg!» prográmmaráiddus, mii álgá ođđajagemánus, galget guhtta Norgga artistta oahppat movt galget addit rámi dan buot mávssolaš olbmui iežas eallimis: Iežas luođi.
Oažžu luođi skeaŋkan
Juohke prográmmas ohppet sii juoigat, ja sii galget ráhkadit persovnnalaš luođi dasa gean leat válljen, ja ovdanbuktit dan sutnje geasa lea luođi ráhkadan.
Son gii oažžu luođi, ii dieđe maidege dan birra ovdal go beassá gullat luođi.
Iežas luohteoahpaheaddji
Juohke artisttas lea iežas luohteoahpaheaddji, ja sii geat galget oahpahit artisttaide luođi čiegusvuođa, leat Sara Marielle Gaup Beaska, Ánde Somby, Frode Fjellheim, Berit Alette Mienna, Johan Anders Bær ja Maxida Märäk.
Artisttat čájehit rámi luđiin
Artisttat geat leat mielde prográmmas leat Elisabeth Andreassen gii juoiggai iežas isidii Torii čájehan dihte man giitevaš son lea buot dan ráhkisvuođa ja doarjaga ovddas maid son lea ožžon sus dán guoktelogi jagis.
Andreassen juoiggai iežas isidii dán luođi moadde vahku ovdal go isit jámii fáhkka, ja danne lea dat oassi hui váivi.
Margaret Berger juoigá iežas oahpaheaddji ja olbmá Anneli Dreckera, Nosizwe Baqwa (Madcon-Tshawe unnaoappáš) gulahallá iežas olbmáin luđiin, Øystein Dolmen čájeha áhčiráhkisvuođa luđiin iežas nieiddažii, Mariai, gii lea jagiid vuordán ruovttus ahte áhčči galgá boahtit ruoktot gierdomátkkis.
Grutle Kjellson (Enslaved vokalista) ges gudnijahttá iežas sieluvielja ja Tuva Syvertsen juoigá iežas ovttasássi Maria ja dasa lassin oahppá son vel iežas ovttasássi sámi bearraša birra.
