Čakčamánu 18. beaivvi gullogoahtá ođđa luohteprográmma «Luođis luohtái» NRK Sámi radios.
– «Luođis luohtái» lea ođđa, sámegielat radioprográmma, mas guorahallet luđiid, maid olis sáhttet sihke ráhkesvuođa ja unohisvuođa dovddut bohciidit, dieđiha NRK.
Ođđa prográmma jođiheaba Ole Máhtte Gaup ja John André Eira. Ole Máhtte jođihii dán jagi Sámi Grand Prix ja lea maid eará radioprográmmaid jođihan. Dán vuoru lea son ožžon fárrui dovddus juoigi, John André Eira. John André lea mielde Gabba joavkkus, mii lea olu beaggán maŋemus áiggiid.
– Mii sávvat guldaleaddjit oahpásmuvvet muitalusaide ja juoigama bokte luđiide, mat gieđahallojuvvojit prográmmas. Guldaleaddji galggašii vásihit studioságastallama dego livččii čohkohallamin dollagáttis, dadjá redaktevra Carl-Gøran Larsson.
Ođđa prográmma sáddejuvvo oktii vahkkus ja vuosttaš prográmmas lea guossin Kárášjoga juoigi Piera Balto. Dan vuosttaš prográmmas lea fáddán givssidanluođit.
Radioprográmmat sáddejuvvojit gaskavahkuid dii. 11:00 – 12:00, ja NRK Radio -áppas sáhtát dan guldalit goas ieš háliidat.
