Sámi Musihkkafestivála lea dán jagi lokten Sámi Grand Prix juoiganoasi vuoittu 20 000 ruvnnuin.
Sámi Musihkkafestivála lea dán jagi lokten Sámi Grand Prix juoiganoasi vuoittu 20 000 ruvnnuin.
Sámi Grand Prix juoigan- ja lávlunoasi vuoitit ožžot fálaldaga doallat konseartta nuppi jagi beassášmárkaniin, ja dan bargui addo bargostipeanda.
Ovddit jagiid lea lávlunoasi vuoiti ožžon 50 000 ruvnno, ja juoiganoasi vuoiti 30 000 ruvnno.
Sámi Musihkkafestivála lea dán jagi lokten juoiganoasi vuoiti vuoittu, bargostipeanda goappaš vuitiin lea mearriduvvon 50 000 ruvdnui.
Liikká stuora konsearttat
Sámi Musihkkafestivála buvttadeaddji Ol Johan Gaup čilge sii leat stivrras ságastallan, ja ovddit jagiid leat vásihan ahte maiddái juoiganoasi vuoiti heiveha musihka luđiide.
– Dakko bokte leat sis maid leamaš sullasaš olggosgolut go lávlunoasi vuoitis, musihkkariid dáfus. Orui govttolaš ahte sii maid ožžot seamma stuora stipeandda go lágidit liikká stuora konseartta, lohká Gaup.
Stipeanda boahtá lassin vuitui, mii lea 20 000 ruvnno.
(Ášši joatká gova vuolábealde)
– Orru beroštupmi searvat
Sámi Grand Prix lágiduvvo beassášlávvordaga Báktehárjjis. Logi ođđa luođi, ja guhtta ođđa lávlaga čuojahuvvojit. Áigemearri dieđihit luođi dahje lávlaga gilvui lea njukčamánu álggus.
– Leat boahtán moadde luođi, muhto eai nu máŋga lávlaga. Muhto oažžut olu gažaldagaid ja olbmot jearahallet movt galget dieđihit. Orru leame beroštupmi searvat, lohká buvttadeaddji.
– Orru šaddame nu ahte eai beasa buohkat mielde geat leat sádden luođi, lasiha son.
Beassášmárkanat
Sámi Beassášmárkaniid prográmma ii leat vel almmuhuvvon, buvttadeaddji lohká illudit almmuhit buot.
Sámi Musihkkafestivála lea dán jagi rievdadan festivála nama. Dál lea Sámi Beassášfestivála.
– Mii háliidit loktet ovdan visot mii dáhpáhuvvá Guovdageainnus beassášmárkaniin, lohká Gaup.
Dat mearkkaša ahte sin prográmmas eai galgga dušše Sámi Musihkkafestivála lágideamit, muhto buot mat leat Guovdageainnus dáid beassážiid.
– Galgá álki gussiide gávdnat visot mii dáhpáhuvvá, lohká son.
