-Almmuhus-
-Almmuhus-
OĐĐASATLokte sámi vuoiŋŋalašvuođa ja lagasvuođa lundui dán vahkkoloahpa

Lokte sámi vuoiŋŋalašvuođa ja lagasvuođa lundui dán vahkkoloahpa

-

-

Sarahkkas álgoálbmotfestiválas lea spagga dievva prográmma. Lágideaddji jáhkká sámi násttiid Mari Boine, Elin Kåven ja Sara Marielle Gaup Beaska geasuhit ollu olbmuid Eidsfossii boahtte vahkkoloahpa. 

Sarahkkas searvi lágida geassemánu 17.–19.beivviid Sámi álgoálbmotfestivála Eidsfossas Holmestrand suohkanis. 

Festiválahoavda ja Sarahkkas searvvi jođiheaddji Astrid Ingebjørg Swart muitala sii háliidit olbmuide ovddidit vuosttažettiin álgoálbmotjurddašeami. 

– Háliidit ovddidit dan máhtu ja árbevirolašvuođa ja lasihit ipmárdusa sámi jurddašanvuohkái, ovdamearkka dihte ahte galgá geavahit dušše dan maid dárbbaša ii ge atnit badjelmeare vai ii vaháguhte luonddu. Lea hui dehálaš ovddidit maiddái mánáide man dehálaš lea váldit vára luonddus ja elliin. Mis leat danne hui olu lágideamit mánáide maid prográmmas, dadjá son. 

Luondduvuoiŋŋaid festivála

Swart lohká sis hui olu fuomášumi dasa ahte luondu eallá, ja gávdno olu doppe maid mii eat oainne. Swart lea olu jagiid juo profileren iežas šamánan iežas Sarahkkas fitnodaga bokte. Dán festiválas, man su searvi Sarahkkas lágida, lea maid vuoiŋŋalašvuohta ja šamanisma vuođđun. 

Festiválaprográmmas lea vaikko mii ja lea oalle guhkki ja girjái. Leat sihke rumbomátkkit, dánsun, juoigankursa, workshopat, musihkka, rituálat ja ságastallamat fáttas. Šamánat ja guvhllárat bohtet nu go Colombias, Ungáras, Dánmárkkus ja maiddái Sámis.

– Mii háliidit loktet vuoiŋŋalašvuođa. Ja lea hui buorre ahte olbmot ohppet sámi árbevieruid ja min kultuvrra, ja maiddái ahte mii beassat ođđa jurdagiid oahppat eará álgoálbmogiin.  Mii áigut ovddidit ja oahpahit movt sáhttá oažžut lagasvuođa luondduin, min etniin, eatnamiin. Movt sáhttá eallit vuollegašvuođain lundui ja luondduárvvuide, dadjá Swart.  

Sámi stuorámus násttit lávddis

Konsearttat leat sihke bearjadaga ja lávvordaga boahtte vahkkoloahpa. Maria ja Yendeni leaba ovddemus lávddis bearjadaga ovdal go Mari Boine boahtá lávdái. 

Lávvordaga konsearttain čuojahit ges Sara Marielle Gaup Beaska, Elin Kåven ja Rohta band, ja dan maŋŋel ges Chakra Band. Goappaš eahkediid čuojaheaba maŋemus vel Gaias tromme, Lius ja Richardo Sanchez. Mikkel Gaup lea maid dovddus olmmái gii galgá rahpat ja guoimmuhit festiválas. 

Dát festivála lea lágiduvvon guktii ovdal. Guovtti maŋemus jagis ii leat lágiduvvon korona geažil. Ovddit háve ledje birrasii vihttačuođi vuvdon beaivepássa guovtti beaivvis. Dán jagi jáhkká son Mari Boine geasuhit olu olbmuid sin lusa. 

– Mu mielas dát artisttat heivejit hui bures vel dán festiválii. Sara Marielle lea nanu luonddugáhttejeaddji, ja nu leaba maid Mari Boine ja Elin Kåven.Mii leat dán festivála stellen vai heive buohkaide, olles bearrašii, sihke mánáide, rávisolbmuide ja vuorrasiidda. Mun illudan erenoamážit lágidit ráhkisvuođaseremoniija, go de bivddán buohkaid boahtit čuoččohit riekkisin ja de rávkkan daid olbmuid rumbomátkái vai ožžot lagasvuođa Sáráhkká ipmilii. Jáhkán olbmot besset návddašit ja illudit lágidemiiguin ja návddašit vel biđđosa man mii vuovdit doppe, dadjá son. 

-Almmuhus-