Nango lea dán jagaš profiila Davvi-Norgga Ođđa Feastariemuin. Son lea duddjon variánta dan árbevirolaš guođohanbarttas - gumpis, maid buktá Gállogieddái ovdal festivála.
Joar Nango boahtá Davvi-Norgga Feastariemuid profiilaprošeavttain «Girjegumpiin» Márkomeannui. Ovttas eará dáiddáriiguin ja duojáriiguin Sámis, Davvi-Norggas ja Davvi-Ruoŧas lea son huksen johtti čoahkkinlanja.
– Lea hui somá go leat ožžon Nango Girjegumpi Márkomennui dán jagi. Mis lea jo festiválagirjerájus, muhto dát šaddá erenoamáš. Girjegumpi lea johtti girjerájus mii johtá báikkis báikái. Das leat girjjit arkitektuvra birra maid beasat lohkat festiválas, muitala festiválajođiheaddji Anne Henriette Reinås Nilut preassadieđáhusas man Márkomeannu lea almmuhan.
Erenoamáš sisdoallu girjegumpis
Gumpi lea johtti barta mii dávjá geavahuvvo guođoheami oktavuođas. Girjegumpi lea de johtti girjerájus mii dál mátkkošta Hársttakas Gállogieddái. Girjegumpis lea erenomáš girjjit arkitektuvrra ja eamiálbmotkultuvrra birra maid sáhtát lohkat festiválas.
– Dán jagaš Márkomeanu festiválaguossit besset vásihit gumpi man earret eará dáiddár Anders Sunna lea herven ja mas beasat oaidnit Katarina Spik Skum dujiid, muitala festiválajođiheaddji.
Reaškinfáktor
Festiválii boahtiba maid Sámi suohttaseamos olbmot; Trine Lise ja Erlend Elias. Ovttas áiguba gávnnahit mii sámi leaika lea Stuorlávus bearjadaga maŋŋelgaskabeaivvi. Dasa lassin lea Erlend Eliasis ságastallan nuoraiguin festiválas oassin Nuoraidmeanus, ja Trine Lise boahtá ges álggahit reaškasa Gállogiettis «stand upa:in» bárabáikkis lávvordaga maŋŋelgaskabeaivvi.
– Dávjá beassat gullat ahte sápmelaččain ii leat iešironiija, eaige gierdda leaikka. Šaddá bahkka digaštallan ja fádda sáhttá orrut leamen veaháš unohas. Trine Lise ja Erland Elias hástaleaba fátta buori osiin humoriin. Lean vissis ahte sihke Trine Lise ja Erlend Elias oažžuba min reaškit albma ládje, lohká festiválajođiheaddji.
Boktit ođđa jurdagiid
– Goappašagat leaba čeahpit hástalit olbmuid ja sáhttiba boktit ođđa jurdagiid ja reflekšuvnnaid mis, nu ahte dát lea juoga masa oallugat illudit festiválas. Ii mihkkege atte buoret oktavuođa go buorre leaika, nu ahte dat lea dehálaš oassi jurdagis min servodagas jagis 2018, boagusta festiválajođiheaddji Anne Henriette.
Márkomeannu 2018 lágiduvvo suoidnemánu 26.b – 29.b 2018. Festiválaráhppan lea Gállogiettis duorastaga eahkedis.
