Guovddášbellodat áigu garrasit bargat ahte Finnmárkku fylka bissu sierra fylkan.
Guovddášbellodat áigu garrasit bargat ahte Finnmárkku fylka bissu sierra fylkan.
Guovddášbellodaga stuoradiggeáirras Geir Iversen ja joavkojođiheaddji fylkkadikkis Kurt Wikan reagereba garrasit go Gurutbellodat, Olgešbellodat, Risttálaš álbmotbellodat ja Ovddádusbellodat áigot juohkit Davvi-Norgga guovtti stuora guovlun.
Manahit gelbbolašvuođa
– Dát bellodagat eai evttot ođđa politihkalaš bargguid fylkkaide, dušše oktiičaskit fylkkaid. Dat lea joatkka sin politihkas guovdduštit Norgga, dieđiha stuoradiggeáirras Iversen preassadieđáhusas.
– Mii manahit gelbbolašvuođa Finnmárkkus guhkit áiggi bokte, ja manahit daid Romsii ja Bådåddjui, muitala joavkojođiheaddji Wikan ja joatká:
– Vásáhusat ráđđehusain ovttas Risttalaš álbmotbellodagain ja Gurutbellodagain čájeha dan. Sii beroštit dušše rájiid sirddášit ja guovdduštit, eai ge atte ođđa bargguid.
Áigot hehttet
Wikan ja Iversen deattuheaba ahte Guovddášbellodat áigu bissehit oktiičaskima jus jienasteaddjit buktet eanetlogu Stuoradikkis. Sudnos lea nanu doarjja dasa.
– Miehtá riikka lea vuosteháhku ráđđehusa guovdduštemiide, ja Guovddášbellodaga stuorrun čájeha ahte olbmot vuosttaldit guovddušteami. Mii lohpidit bissehit bággoheaittiheami Finnmárkku sierra fylkan, jus olbmot addet midjiide fámu, muitaleaba Wikan ja Iversen preassadieđáhusas.
