EU-ministtar Frank Bakke-Jensen lohpidii odne ahte Guovdageidnui huksejuvvo ođđa joatkkaskuvla ja teáhtervisti oktanaga. Guovdageainnu sátnejođiheaddji Johan Vasara (Bb) lohká dán illusáhkan, muhto ahte nu guhká go ii boađe čielga ruhtadáhkádus, de ii leat mihkke vuos sihkar.
EU-ministtar Frank Bakke-Jensen lohpidii odne ahte Guovdageidnui huksejuvvo ođđa joatkkaskuvla ja teáhtervisti oktanaga. Guovdageainnu sátnejođiheaddji Johan Vasara (Bb) lohká dán illusáhkan, muhto ahte nu guhká go ii boađe čielga ruhtadáhkádus, de ii leat mihkke vuos sihkar.
EU-ministtár ja Finnmárkku Olgeža vuosttaševttohas Stuoradiggái, Frank Bakke-Jensen, doalai odne preassakonferánssa Sámi joatkkaskuvllas ja boazodoalloskuvllas Guovdageainnus.
Oallugat ledje čoahkkanan gullat makkár ođđasiid son lea boahtán ovdanbuktit.
Ráđđehus dahkan mearrádusa
Ráđđehus lea mearridan áššis ja Bakke-Jensen sáhtii muitalit ahte Guovdageidnui huksejuvvo sihke ođđa joatkkaskuvla ja ođđa teáhtervisti oktanaga.
Čoavddus lea hukset oktasaš vistti, sihke joatkkaskuvlla ja Beaivváža ovtta dáhki vuollái.
– Mearrádus lea dahkkon ráđđehusas, muhto in duostta dadjat goas dát bargu bušetterejuvvo. Mii fertet maid earret eará ovttasbargat Sámedikkiin, go Sámedikkis lea ovddavástádus Beaivvážii, lohká Bakke-Jensen.
Dehálaš politihkalaš ášši
Frank Bakke-Jensen lohká ahte dá lea ášši mainna politihkalaččat ii áiggo vuollánit.
– Dát lea dál dehálaš ášši man fertet čuovvolit ja mii vuordit gealdagasas dan sárggastusa mii galgá leat gárvvis dán jagi loahpas. Politihkalaččat lea dá ášši mainna in áiggo vuollánit go dá lea hirbmat dehálaš ášši. Dá lea buorre skuvlaášši, ja teáhterkultuvra lea dehálaš, nu ahte jáhkán lea hui buorre dan guokte časkit oktii, lohká Bakke-Jensen.
Ođđa viessosadji
Joatkkaskuvlii lei mearriduvvon viessosadji LES-viesu báldii, muhto dán jurdaga leat dál guođđán.
Beaivvážis lei ovdagihtii jurddahuvvon viessosadjii Gáhkkorluddii, ovddeš NRK-vistti lahka, ja dát viessosadji lea dál mearriduvvon dan oktasaš vistái.
Ii duostta dadjat goas visti gárvána
Frank Bakke-Jensen ii duostta gal addit čielga dieđu goas visti sáhttá leat gárvvis.
– In duostta gal dadjat juste goas visti ceaggana, muhto olu lea juo dahkkon, sihke Beaivváža ja joatkkaskuvlla bealis leat earret eará arealadárbbut gárvásat. Lea realisttalaš ahte dán jagi loahpas gárvána buorre areálasárggastus ja ahte čielggadit ruhtadárbbuid farggamusat, vai ruhtadeami sáhttá ollašuhttit, lohká son.
Ii leat válgalohpádus
Frank Bakke-Jensen ii loga dán boađusin das go oaiviliskkadeamis manai hejot, ii ge loga dán válgalohpádussan.
– Dainna lean hui guhká bargan, politihkalaš bargu lea guhkitáigge bargu ja áššiid ii sáhte nu jođánit álo čoavdit. Mun livččen dieđusge sáhttán vuordit dainna ságain, muhto dát lea mearrádus man mearrideimmet ráđđehuskonferánssas. Olbmot ožžot gal dieđusge leat duhtavaččat ja somá jus jienastit mu, muhto dákkár čovdosiid ádjana guhká oažžut sadjái, lohká Bakke-Jensen.
Váillaha čielga ruhtadáhkádusa
Guovdageainnu sátnejođiheaddji Johan Vasara, Bargiidbellodagas, lohká dán illosáhkan, ii dušše Guovdageidnui, muhto maid olles Finnmárkui ja Sápmái.
Goitge ii loga son maidege sihkkariin, go ruhtadáhkádus ii leat vuos boahtán.
– Buorre go lohpidit guorahallama čađahit juovllaide, muhto ii leat mihkke sihkar nu guhká go ii boađe čielga ruhtadáhkádus, lohká Vasara.
