-Almmuhus-
-Almmuhus-
MAGASIIDNA Lohkkiid romántta­leamos vásá­husat

Lohkkiid romántta­leamos vásá­husat

-

-

Darvánan riesaldagat, ruovttusráhkaduvvon hamburger hábmejuvvon dego váibmu ja smávva árgabeaidagut.  Dat lea min lohkkiid mielas dat albma romantihkka. 

Rukses liđiid, fiinna skeaŋkaid ja váimmuid jurddašit varra dávjá go lea sáhka románttalašvuođas.  Muhto, nu ii oro gal min lohkkiid gaskkas.  

Odne lea  «Valentines-beaivi» dahje  «ráhkisvuođa ja ustitvuođabeaivi».  Ávvir lea bivdán lohkkiid muitalit iežaset románttalaš vásáhusaid birra. Lohkkit lea dusten min hástalusa. 

Muital don ge mii lea eanemus románttalaš maid leat vásihan dahje dahkan. Sáddes oanehis čállosa (ii dárbbaš go okta cealkka, muhto áinnas čále eambbo).  Buohkat geat servet leat mielde vuoittu vuorbádeamis. Vuoitu lea gaskabeaivvit guovtti olbmui dan báikkis gos vuoiti orru dahje gos háliida boradit.

Sáddes iežat vásáhusa: post@avvir.no ovdal sotnabeaivvi 16.2. dii 24.00. 

Dás vuolábealde logat muhtun lohkkiid vásáhusaid ja de fuobmát ge ahte lieđit ja skeaŋkkat eai leat guovddážis sin románttalaš vásáhusain: 

Darvánan riesaldagat 

Gáržžes doalloviesus Mázes gos ledje heajat, darvánedje mu liinni riesaldagat amas bártni gákterohkiide gitta.

Moai bártideimme beassat luovos. Dat amas bárdni moddjái munnje ja logai:

– Dál don gal leat mu. In luoitte du šat. Fertet leat mu mielde dan eahkeda.

15 jagi mannjel doalaime heajaid seamma doalloviesus.

Marit Helene Eira 

Čájáhusgovva: Gorm Kallestad / NTB Scanpix
Čájáhusgovva: Gorm Kallestad / NTB Scanpix

Smávva árgabeaidagut 

Mu mielas leat dat beaivválaš románttalaš dagut mat eanemusat liggejit váimmu, go dat muittuha juohke beaivvi man ráhkis beallelaš lea munnje.

Go mus lea čoahkkin eahkes inge olle ruovttus fitnat maŋŋel barggu, de láve mu isit dávjá buktilit munnje gaskabeivviid bargui. Dat lea mu mielas nuu románttalaš dahkku, vaikko son ii soaitte jurddašan ge leat románttalaš.

Mun anán goit hui árvvus dan ❤

Marie Louise Lantto

Čájáhusgovva: Gorm Kallestad / NTB scanpix
Čájáhusgovva: Gorm Kallestad / NTB scanpix

Oadjebasvuođadovdu maid isit addá 

Dat buot eanemus romantihkalaš máid mun lean vásihan ja ain vásihan lea dat oadjebasvuoðadovdu máid mus isit addá munnje beaivválaččat. Mun sáhtán čuojahastit ja muitalit ahte dárbbašan doarjaga dahje veahki ja mu isit luoitila buot mii lea gieðaid gaskas ja boahtá nu joðánit go vejolaš.

Ja son lea maid hui čeahppi beaivválaš románssain. Ovdamearkka dihte jus ráhkada ruovttusráhkaduvvon burgeriid de oaččun mun dakkára mii lea hábmejuvvon dego váibmu.

Mu váibmui báhcet muitun dat smávva diŋggat máid son bargá beaivválaččat.

Ferten gal namuhit ahte in goassege leat ožžon liðiid dahje vásihan dakkár albma stuora romantihkalaš dagu, dego filmmain oaidná.

Mun lean hirbmat duhtavaš dainna juohkebeaivválaš románssain máid oaččun isidis beaivválaččat. Buoret oažžut veaháš fuomášumi beaivválaččat go hirbmat ollu dušše oktii jagis.

Elisabeth Kneppen-Strømeng Olsen

Čájáhusgovva: Elen Marianne Utsi
Čájáhusgovva: Elen Marianne Utsi

Teadjagohpu

Juohke beaivvi maŋemus golbma vahkku lea mu ovttasássi boktán mu ja buktán munnje teaja seŋgii.

Lossa áigodaga maŋŋel háliidii son rievadit iđitrutiinnaid vai munnje šaddá beaivvi álgu buoret.

Vaikko son láve buktit liđiid ja bovdet mu restoráŋŋii boradit muhtomin, de lea mu mielas dat go buktá munnje teadjagohpu seŋgii dat eanemus romantihkalaš dahku maid son lea dahkan.

Anette Berglund, Drammen

- Advertisement -
-Almmuhus-