-Almmuhus-
-Almmuhus-
OĐĐASAT Logis dušše johtolagas borgemánus

Logis dušše johtolagas borgemánus

-

-

Dan golmma geassemánus dušše 25 olbmo johtolagas, ja logis dain dušše borgemánus. Gaskamearálaš lohku láve leat 40, muhto dán jagi lea lohku mealgat unnit go dábálaččat.

– Geassi lea áigi go máŋggas duššet johtolagas. Várra heakka massit dahje bahut roasmmohuvvat lea guovtte geardde stuorát dán áigodagas jagis go geahčadit viđa maŋemus jagi oktan. Dát jahki lea earálágan. Leat leamašan máŋga fasttes lihkohisvuođa, muhto oaidnit duššanlogu njiedjama dán geasi, lohká Trygg Trafikk direktevra Jan Johansen gii oaivvilda ahte guhkit áigge ollislaš bargu lea čoavddan dasa.

 

Eanemusat Nordlánddas

Nordlánddas leat eanemusat duššan dán jagi go 12 olbmo leat duššan johtolagas. Diibmá dušše viđas.

Ferte geahčestit 2010 rádjái ovdal go oaidná loguid go eambbogat dušše go dán jagi.

– Mii oaidnit duppalastima diimmáža ektui Nordlánddas, mii lea guhkkin eret dat ovdáneapmi maid sávvat. Dat čájeha ahte ain dárbbašuvvo bargat garrasit ovdal go sáhttit leat duhtavaččat, lohká Johansen. 

Borgemánus ledje guhtta biilavuoddji, guovttis mielde biillas, okta sihkkelasti ja okta mohtorsihkkelvuoddji geat dušše johtolagas. Sii ledje guhtta dievddu ja njeallje nissona.

Finnmárkkus ja Romssas leat guovttis duššan johtolagas dán jagi.

 

- Advertisement -
-Almmuhus-