Golggotmánu dán jagi heavvanedje Norggas oktiibuot logi olbmo.
Norggas lea dán jagi heavvanan 84 olbmo, mii lea uhccit golbma maŋimuš jagiid ektui, dieđiha Norsk Folkehjelp preassadieđáhusastis.
Golggotmánus heavvanedje čieža almmáiolbmo ja golbma nissonolbmo. Eanaš lihkohisvuđat leat dáhpáhuvvan nu mo ovdalge, ahte olbmot leat gahččan fatnasis dahje nannámis.
– Dát lea maid sivva eanaš heavvanemiide Norggas. Dán muttus áiggi jagis lea čáhci galmmas ja sáhttá jođánit šaddat váralaš jus gahččá čáhcái. Danin lea dehálaš ahte lea várrugas ja eastadit gahčamis čáhcái jus lea bargamin lahka čázi, lohká Norsk Folkehjelp gádjun- ja vuosttašveahkki ossodaga jođiheaddji Jon Halvorsen.
Albmát badjel 40 jagi
Gahččat eatnamis čáhcái lea sivva badjel 50 proseantta heavvanemiide Norggas dássážii dán jagi ja dán jagáš heavvanan statistihkas leat eanemus albmát badjel 40 jagi. Møre ja Romsdal fylkkas lea eanemus olbmot heavvanan dán jagi, oktiibuot logis, ja Rogaland ja Buskerud fylkkas lea ovcci olbmo heavvanan.
Norsk Folkehjelpa statistihkalaš materiála man gallis lea heavvanan ja sivat dasa, leat sii háhkan Norgga media bokte. Norsk Folkehjelp dáhtu olbmuid dieđihit sidjiide jus dihtet ahte muhtin lihkohisvuohta ii leat mielde dán statistihkas vai statistihka šaddá nu riekta go vejolaš.
