-Almmuhus-
OIDNON JA GULLONLogi máná mánáid­suodjalusa fuola­husas jápmán 2020 rájes

Logi máná mánáid­suodjalusa fuola­husas jápmán 2020 rájes

Journalista

-

-

Njukčamánu 2020 rájes leat leamaš 190  iešsorbmengeahččaleami Norgga mánáidsuodjalusinstitušuvnnain. Dušše ovtta jápmima leat dutkan.

Njukčamánu 2020 rájes leat 102 máná geahččalan sorbmet iežaset oktiibuot 190 geardde. Logi máná leat jápmán mánáidsuodjalusa fuolahusas, máŋggas dain iešsorbmemiin, boahtá ovdán NTB preassadieđáhusas.

Leat registrerejuvvon badjel 1 650 duođalaš dáhpáhusa Norgga mánáidsuodjalusinstitušuvnnain dan áigodaga, mii dagaha birrasii guokte dáhpáhusa beaivái.

– 190 iešsorbmengeahččaleami dán áigodaga lea balddihahtti. Muhto váldonjuolggadus lea ahte geahččaleamit eastaduvvojit, dadjá Bufdir divišuvdnadirektevra Kjetil Ostling.

Dušše ovtta jápmima lea Bufdir dutkan. De lei 13-jahkásaš nieiddaš gávdnon jápmán maŋŋel go lei báhtaran mánáidsuodjalusinstitušuvnnas Bergenis, miessemánus 2022:s.

Dáhpáhusat mat eai guoskka iešsorbmemii dahje jápmimii, sáhttet leat earret eará mánát geat báhtarit, áitet bargiid dahje earáid institušuvnnas, dahje seksuálalaččat illastuvvojit go orrot institušuvnnas. Leat maid registrerejuvvon earret eará buollimat.

Leat ollu duođalaš dáhpáhusat, duođašta Bufdir. Sivvan dasa leat mánát geat orrot doppe, ii fal ahte institušuvnnain lea mihkke boasttuvuođaid, oaivvilda direktoráhtta.

– Doaimmahit mánáidsuodjalusinstitušuvnnaid lea okta dain eanemus máŋggadáfot ja gáibideaddji čálgobargguin mii mis lea. Mánát ja nuorat geat orrot institušuvnnain leat dávjá vásihan olu váivvi eallimis ja leat iešguđetlágan dárbbut. Man olu duođalaš dáhpáhusat leat speadjalasttejit juste dan, dadjá Ostling.

-Almmuhus-