Golmmalotjahkásaš Guovdageainnu dievdu gii lea várohuvvon goddán olbmo Skiellehis, Ruoŧas lea dál áššáskuhtton iešmielat goddán, ja molssaevttolaččat eaktodáhtus goddán.
Golmmalotjahkásaš Guovdageainnu dievdu gii lea várohuvvon goddán olbmo Skiellehis, Ruoŧas lea dál áššáskuhtton iešmielat goddán, ja molssaevttolaččat eaktodáhtus goddán.
Guovdageainnu dievdu lea áššáskuhtton iešmielat goddán, molssaevttolaččat eaktodáhtus goddán go lea čuggen logi geardde muhtin 20-jahkásaš dievddu nu ahte jámii. Dáhpáhus lea geavvan dakka maŋŋel gaskaija, golggotmánu 9. beaivvi, Moro Bäcke Torgas, olggobealde Skiellet guovddáža.
Duššan dievddu golbma olbmá, guokte nissona ja okta dievdu leat ges áššáskuhtton go leat geahččalan rievidit ja doaruhit ja maiddái geavahan narkotihka.
Sihke «mord» ja «drap»
Ášši Áktor Andreas Nyberg muitala Ruoŧas leat guokte suorggi mat geavahuvvojit olmmošgoddimii.
– Vuosttaš lea goddin (mord), mii lea go iešmielat ja iešdáhtos goddá nuppi olbmo. Nubbi lea eaktodáhtus goddán (drap), mii geavahuvvo go gávdnojit áššis mat dagahit ahte ii gehččo nu duođalaččat go «mord», nu movt dán áššis gos lea várjalan iežas, lohká son.
Ii lean narkotihka
Duogáš áššái lea narkotihka gávppašeapmi gos duššan dievddu joavku lei čuoččuhan alddis narkotihka, ja sis lei ulbmil rievidit ruđaid Guovdageainnu dievddus ja su olbmás.
– Joavkkus ii lean duođas narkotihka, ja ledje seamma eahkeda gávppašan 750 grámma nougat, maid ledje páhkken nu ahte galggai sulastahttit narkotihka, muitala áktor Andreas Nyberg.
Logi geardde čuggen
Nyberg muitala guovdageaidnulaččas ja su olbmás lei mielde 35.000 norgga ruvnnu ja 3500 ruoŧa ruvnnu. Go ruđat eai mákson, de geahččalii joavku rievidit ruđaid guovdageaidnulaččas ja su olbmás.
– Falleheami oktavuođas de čuggii Guovdageainnu dievdu 20-jahkásaš dievddu, logi geardde niibbiin nu ahte jámii. 20-jahkásaš dievdu lei čukkohallan čeabehii, raddái ja čielgai. Guovdageainnu dievdu lei maid čukkohallan guovtte geardde, raddái ja gihtii, muitala Nyberg.
Golbma niibbi
Nyberg muitala goappašat joavkkuin ledje niibbit fárus deaivvadeapmái.
– Guovdageainnu dievddus lei niibi fárus, ja dan 20-jahkásačča joavkkus ges ledje guokte niibbi fárus.
Diggái boahttevahkus
Ášši lea sáddejuvvo Skiellet diggeriektái, ja álgá juovlamánu 7. beaivvi.
– Guovdageainnu dievdu lea dovddastan daguid. Iešsuodjalusčuoččuhus galgá geahččaluvvot dikkis, lohká áktor Andreas Nyberg.
Hirpmástuvvon áššáskuhttomii
Guovdageainnu dievddu bealušteaddji, Jens Nystrøm, J. N. Advokatbyrå AB advokáhtta fitnodagas, lea hirpmástuvvan go su klieanta lea áššakuhtton sihke «mord» ja «drap».
– Lean hirpmástuvvan go lea áššáskuhtton maid «mord» vuođul, danne go dán áššis leat ollu mat čájehit ahte galggašii geahpidit, lohká son.
Čuožžilii go fallehuvvui
Nystrøm lohká vaikko su klieanta lea logi geardde čuggen nuppi olbmo, de lea dahkan dan danne go geahččalii iežas várjalit.
– Dás ferte ipmirdit ahte mu klieanta dat fallehuvvui joavkkus, geat ovddalgihtii ledje hutkan rievidit su. Olles dat goddinášši han vuolggahuvvui go mu klieanta fallehuvvui, iige livčče dáhpáhuvvan jus ii livčče fallehuvvon. Mu klieanta balai iežas heakkas.
Gáibida luitot luovus
Danne áigu Nystøm dikkis boahtte vahkus gáibidit ahte su klieanta ii galgga dubmehallot movt lea áššáskuhtton.
– Mu klieanta lea dovddastan daguid, boahtá biehttalit áššáskuhttimii go lea iežas várjalan. Danne boađán mun gáibidit ahte áššehuvvá ja luito luovus ovttatmanus, lohká Nystrøm.
Gearggus geahččalit dikkis
Nystrøm muitala su klieanta lea vuorjašuvvon áššáskuhttomiin, muhto lea ipmárdus ahte sáhtii ná áššáskuhttot.
– Ii sus leat dieđusge dál nu buorre dilli, go ná duođalaš áššis lea áššáskuhtton, muhto lea gearggus geahččalit ášši dikki ovddas, lohká su bealušteaddji Jens Nystrøm.
