Máttasámi festivála Raasten rastah 2021 lágideaddjit dieđihit ahte festivála lágiduvvo čakčamánu 30. beaivvis gitta golggotmánu goalmmát beaivái Plassjes.
– Eanaš doalut leat Storstuggu báikkis, muhto maid Bergstaden ziir, Rørosmuseet, Verket ja Skanckebua báikkiin lea maid festiválaprográmma. Raasten Rastah festivála lea viiddis prográmma ja heive olles bearrašii, leat doaimmat mánáide, nuoraide ja rávisolbmuide, dieđihit Raasten rastah lágideaddjit preassadieđáhusa bokte.
Festivála lea máttasámiid kultuvrralaš ja sosiála deaivvadanbáiki. Lágideaddjit, Plassje gielda ja Trøndelága fylka, muitalit sii lágidit bargobájiid mánáide ja nuoraide ja semináraid iešguđet fáttáid birra. Boahtte vahkoloahpa besset olbmot vásihit konsearttaid, čájáhusaid, valáštallamiid ja olu eanet. Borramuša fállet Rørosrein festiválakafeas Storstuggus.
Váldodáhpáhus lea erenoamáš konsearta Máttasámi beakkán artisttain Marja Mortenssoniin ja Kringkastingsorkestretiin (áibmomediaorkeastariin) Bergstaden ziir báikkis bearjadateahkeda. «Guevtelen hearskah» fállojuvvo Røros hoteallas. Das maŋŋá geigejuvvo Máttasámi kulturbálkkašupmi. ISAK musihkkajoavku čuojaha Storstuggus. Máttasámi artista ja dánsejeaddji Marika Renhuvud guoimmuha dánsunčájálmasain «Mannem vuajnah» mii lea sámi identitehta ja gullevašvuođa birra. Marika lea ráhkadan koreografiija čájálmassii ja sus lea mielde dánsejeaddjit Liv Aira og Kajsa Nilsson.
