DNA-iskosat duođaštit ahte guollemoalut vikiŋgagávpogis Hedebyas Duiskkas bohte Lofuohtas. Lei go mátkeniesti, vai lea go dá duođaštus ahte goikeguolli lea Norgga boarráseamos gávpegávlu?
Oslo universitehta biodieđa instituhta Bastiaan Star ja Sanne Boessenkool leaba bargan boares DNA-iskosiiguin. DNA gávdno buot ealli organismmain, muhto go organismmat jápmet, de DNA hui dávjá boatkana. Aŋkke gávdnojit DNA-bázahusat sihke mumiin ja dávttiin.
Viežžat DNA guolledávttiin
Star ja Boessenkool leaba ovdánahttán vuogi movt viežžat DNA-bázahusaid boares guoledávttiin. Soai leaba ovttasbargan Storbritannia Cambridge Universityin iskosiin mas leat iskan guovlluid gos vikiŋggat leat orron, ja leat dál konkluderen ahte guolit, maid sii leat gávdnan, bohtet Lofuohtas.
Vikiŋagávpot Hedeby
Hedeby Duiskkas lei okta dain guovlluin gos sii rogge guollemoaluid.TV-ráidu «Vikings» lea olu namuhan Hedeby gávpoga.
Dán gávpogis leat arkeologat gávdnan dološ guolledávttiid, ja dán rádjái eai leat nagodan gávnnahit bohtet go guolledávttit báikkálaš guliin vai eará guovllus gávpegálvun. Dutkit leat buohtastahttán DNA iešguđet vikiŋgaáiggi ássanguovlluin ja ođđaáigásaš guliin, ja leat konkluderen ahte Hedeby guolli bođii Lofuohtas gaskal jagiid 800 ja 1066.
Lei go goikeguolli gávpegálvu?
Lea guhká leamašan sáhka ahte goikeguolli lei vikiŋggain dehálaš gávpegálvu, muhto dát ii leat vel duođaštuvvon. Jus dát guolledávttit, mat leat mielde iskosis, leat leamašan gávpegálvun, de lea dá dehálaš duođaštus ahte guolleealáhus lea leamašan Norgga gálvu juo guhkit áigge.
– Ovddeš gávppašeapmi goikeguliin, jus dát čájehuvvo nu dáin dávttiin, sáhttá duođaštit ahte goikeguolli lei lonohallangálvu, ja ahte dološ áigge lávejedje lonohallat beaivválaš dávviriiguin ja eará earenomáš dávviriiguin. Dá sáhttá leat stuora rievdadus álbmogiid ja olbmuid gaskavuođa dáfus, ja das movt sii geavahedje luondduriggodagaid, muitala Bastiaan Star.
