-Almmuhus-
OĐĐASATLobihis luodda ráhkaduvvon, suohkan árvvoštallá váidit

Lobihis luodda ráhkaduvvon, suohkan árvvoštallá váidit

-

-

Maŋŋel go Guovdageainnu suohkan oaččui cavgileami lobihis luotta birra lulábealde Máze, leat sii fitnan báikkis ja sáhttet duođaštit cavgileami doallat deaivása.

Guovdageainnu suohkan oaččui gieskat cavgileami lobihis luotta birra mii manná bartta lusa Máze lulábealde.

Duođašta lobihis luotta

Suohkaninšenevra Nikken Turi duođašta Ávvirii ahte suohkan lea leamaš diđošteame doallá go cavgileapmi deaivása, ja sáhttá maid duođaštit ahte lea dahkkon lobihis luodda bartta lusa.

– Oaččuimet cavgileami ahte Máze lulábealde lea čađahuvvon luoddabargu muhtin bartta lusa, ja cavgileaddji sáddii maid gova lobihis luottas. Mii leat aiddo leamaš báikkis diđošteame doallá go cavgileapmi deaivása, ja lea čielggas ahte lea dahkkon luodda bartta lusa, dadjá Turi.

VÁLDET VIIDÁSET ÁŠŠI: Guovdageainnu suohkaninšenevra Nikken Turi lohká suohkana váldit ášši viidáset. Vuorkágovva: Risten Biret Elle Eira
VÁLDET VIIDÁSET ÁŠŠI: Guovdageainnu suohkaninšenevra Nikken Turi lohká suohkana váldit ášši viidáset. Vuorkágovva: Risten Biret Elle Eira

Sáhttet árvvoštallat politiijaide váidit

Suohkaninšenevra lohká álgovuorus luoddadahkkiid gohččut čorget eret lobihis luotta, ja son lohká suohkana váldit ášši viidáset. Jus gohččun ii čuvvojuvvo, de árvvoštallet suohkanis politiijaide váidit ášši.

– Dábálaččat addit vuos álggos bartaeaiggádii gohččuma čorget eret luotta, muhto jus eat čuovo gohččuma, de sáhttit árvvoštallat politiijaide váidit ášši, lohká Turi.

Geatnegahtton čuovvut

Dakkár áššit meannuduvvojit Plána- ja huksenlága 32. Kapihttala vuođul, mii fátmmasta suohkana ovddasvástádusa čuovvulit dákkár áššiid ja njuolggadusaid gohččuma ektui.

Geavatlaččat lea vejolaš ohcat huksenlobi maŋŋel go lea huksen luotta, muhto jus ii addojuvvo lohpi, de lea suohkanis lága mielde vejolašvuohta addit luoddadahkkái gohččuma sihkkut luotta. Luoddadahkki oažžu ovdagihtii čálalaš várrehusa, ja sihkkungohččun sisttisdoallá áigemeari goassážii galgá čorgen eret luotta. Jus ii čuovo gohččuma ja čorge eret luotta áigemearrái, de sáhttet váikkuhusat leat rihkusdivat, bággosáhkku dahje sáhkku.

Váttisvuohtan suohkanii

Bartaeaiggádiin ii leat lohpi dahkat luottaid barttaid lusa jus eai leat ohcan dasa lobi. Suohkaninšenevra lohká suohkanis váttisvuohtan go bartaeaiggádat dahket lobihis luottaid barttaid lusa, earenoamážit báikkiin gos leat olu barttat.

– Gaskaboddosaččat eat váldde earet juste dán ášši, vaikko dát lea juoga mii dáhpáhuvvá dávjá báikkiin gos leat olu barttat. Diehtit ahte ovdamearkka dihte Silisávžžis geavvá dat dávjá, ja suohkan váldá viidáset áššiid go oažžut cavgilemiid lobihis luottaid birra, lohká Turi.

Ávvir lea váldán oktavuođa bartaeaiggádiin, muhto son ii loga dovdat ášši, ii ge hálit searvat jearahallamii.

-Almmuhus-