Guolásteaddjit geat bivde lobiheamet Veahčajogas 2017:s galget viimmat gearregii. Lappi gearretriekti čoahkkana Ohcejogas guovvamánu 14. beaivvi dán jagi. Suoma vuođđolága mielde lea sápmelaččain vuoigatvuohta doalahit iežaset eallinvuogi, ja dán vuoigatvuhtii gullá maiddái guollebivdu.
Dálá lága mielde bivde njeallje guolásteaddji lobiheamet, vaikke guollebivdu Deanus ja dan oalgejogain gullá sámi eallinvuohkái.
Bivdit ledje Veahčajoga oasusgotti ságadoalli Anne Nuorgam, oasusgotti čálli Kati Eriksen ja su 17-jahkásaš bárdni Erke Eriksen ja oasusgotti ovddit ságadoalli Heidi Eriksen.
– Dát guollebivdit leat bargan ná daningo sis lea ulbmilin nuppástuhttit guolástanlága go láhka ii vástit sámiid riekteáddejumi. Lágat galggašedje leat dakkárat, ahte dat adnojit vuoiggalažžan. Guovllu sápmelaččain lea vuoigatvuohta bivdit Deanučázádagas, masa lohkkojit maiddái stáhta čáhceviidodagat, muitala Sámi olmmošvuoigatvuođaid searvvi ALVA oktavuođaolmmoš Aslak Pieski preassadieđáhusas.
– Gažaldat lea viidásut ášši, go dušše guollebivdu. Lea sáhka sápmelaččaid rievttis, eallit sápmelažžan ja ollašuhttit iežaset eallinvuogi. Guolástanárbevierut gullet sámi eallinvuohkái, daningo dat nannejit bearašoktavuođaid, giela, vieruid ja árbedieđu, joatká Pieski.
Deanusoahpamuš riidu
ALVA – Sámi olmmošvuoigatvuođaid searvi lea vuođđuduvvon jagi 2018:s, man ulbmil lea dorvvastit sápmelaččaid vuoigatvuođa doalahit, ollašuhttit ja ovddidit iežaset eallinvuogi ja maiddái doarjut ja ovddidit sámiid kultuvrralaš, gielalaš, sosiálalaš, vuoigatvuođalaš ja dábálaš ekonomalaš viggamušaid.
Riidu Deanu ja dan oalgejogaid guollebivddus buollái geasset 2017:s, go Deanu ođđa soahpamuš ja guolástanláhka bođii fápmui.
Sápmelaččaid mielas stáhta guollebivddu stivren lea mannan menddo guhkás, daningo Deanusoahpamuša mielde árbevirolaš fierbmebivdu lea gáržžiduvvon measta 80 %:in ja oalgejogaid bivdu lea geavatlaččat gildojuvvon stáhta jogain, čállet sii preassadieđáhusas.
