Odne eahket lea Lávdi Finnmárkku konsearta Álttá guovddážis Finnmarksløpet oktavuođas.
Dáid beivviid lea Lávdi Finnmárku johtán Finnmárkkus Finnmarksløpet oktavuođas ja doallan konsearttaid.
Sii leat leamaš Deanus, Vuonnabađas, Girkonjárggas ja Kárášjogas, ja odne eahket leat Álttás.
– Lea leamaš hui buorre. Olu olmmoš ja buot lea mannan hui bures. Dán jagi lei eanet olmmoš Kárášjogas go diibmá, lei gal olu olmmoš diibmá, muhto dál lei eambbo, lohká Lávdi Finnmárkku buvttadeaddji Kai Somby.
Elle Márjá ja Margaret
Lávdi Finnmárkku ovddasteaddjit leat movttegat go leat ožžon beakkálmasaid Elle Márjá Eira ja Margaret Bergera dán jagáš prográmmii.
Margaret Berger lea mielde NRK ođđa TV-ráiddus «Muitte mu», mas son gudnejahttá Anneli Dreckera persovnnalaš luđiin.
Guovdageainnu nieida Elle Márjá Eira lea sámi artista gii lea beaggán iežas lagas ja persovnnalaš musihkain.
Konsearta galggai odne beaivet, muhto lea maŋiduvvon eahkedii.
Elle Márjja, Margareta ja eará artisttaid lea vejolaš oaidnit ja gullat odne eahket Álttá guovddážis.
Ollejit molli
Dál leat FL-1000 beanaráiddut vuolgán Kárášjogas, ja vuosttažat leat olleme Jotkii, gos bisánit ovdal go dollejit viidáset Áltái.
Otná ija mielde vurdet daid ovddemusaid mollii Áltái.
