LKAB ruvkefitnodat dieđiha ahte sin ruvkkiid buvttadeapmi Gironis, Málbmaváris ja Veaikeváris bistá gitta 2060 rádjái.
Fitnodat lea 700 miljovnna ruvnna ovddas bovren ja iskan man olu málbma gávdno guovllus. Dál leat gávdnan eanet málmma buot golmma ruvkkes sihke Gironis, Málbmaváris ja Veaikeváris.
LKAB ruvkefitnodat navdá ahte ruvke sáhttá buvttadit málmma 40 jagi vel, gitta 2060 rádjái. Sihke Gironis ja Málbmaváris fertejit álgit bovret guhkkelii eatnanvuollái go dássážii leat dahkan, buvttadan dihte eanet málmma.
Nu dieđiha LKAB fitnodat iežaset neahttasiiddus.
