-Almmuhus-
-Almmuhus-
-Almmuhus-
OĐĐASAT– Livččen seamma sajis njulgen geidnui

– Livččen seamma sajis njulgen geidnui

-

-

Boazodoalli Johan Persen Eira dovdá Beaskađas guovlu seamma bures go iežas buksalupma, son rámida 25 skuvlaoahppi ja guokte oahpaheaddji geat birgejedje buollašis.

Maŋŋebárgga eahkeda gárte 25 Álttá joatkkaskuvlla valáštallanoahppi ja guokte oahpaheaddji jorgalit čuoiganmátkkis. Sii eai máhccan seamma máđiráigge go manadettiin, oahpaheaddjit válljejedje nuppe sajis čuoigat go lei lagabui geidnui. Oahppit galge rievtti mielde rasttildit Beaskađasa Guovdageainnu ja Álttá suohkanráji bokte, dán gaskas galge idjadit tealttáin.

 

Jierpmálaš mearrádus

Beaskađasa boazodoalli ja mázelaš Johan Persen Eira dovdá guovllu bures. Go čilget sutnje gokko nuorat njidje geidnui, de diehtá muitalit ahte báikki gohčodit Vuolemushoaŋkan. Guovllus lea ceakkus, ja sihke váhnemat ja oahppit leat imaštallan manin oahpaheaddjit válljejedje dákko njiedjat geidnui.

  – Lea oalle ceakkus, ja seavdnjadin sáhttá veahá váralaš. Fievrruin gal in lean vuodjit diekko, muhto vázziolmmoš gal birge bures. Suolovuopmái livččii olu guhkit čuoigat, danin leaba oahpaheaddjit dahkan jierpmálaš mearrádusa. Mun maid livččen diekko njiedjat geidnui, dadjá Eira.

 

Váhnemat ledje boahtán Silisávžái viežžat nuoraideaset, sii gárte diibmoviissaid vuordit go oahppit ja oahpaheaddji guovttos illá deive geidnui. Alice Balto priváhtagovva.

 

Illá deive geidnui

Skuvlaoahppit čuoigaledje Suolovuomis maŋŋebárgga iđida. Go ledje čuoigan badjel miilla, de bisánedje teltet. Buohkain eai lean doarvái bivut ja buot primusat eai doaibman buollaša geažil. Guovllus ledje sullii 25 buolašgráda eahkedis. Danin mearridedje oahpaheaddjit botket mátki ja jorgalit ruoktot. Váhnemat ožžo dieđu viežžat ohppiid Orvvošguras, Silisávžžis. Máhcadettiin riŋgejedje nuorat sihke váhnemiidda ja politiijaide muitalit ahte leat láhppon, eai ge šat deaivva geidnui. Guovllus álggahuvvui masá ohcanakšuvdna, muhto ovdal dan gávdne oahppit ja oahpaheaddjit fas geidnui. Skuvla lea maŋŋel šiitán ahte oahppit ledje láhppon.

 

Loga maid: Eadneváibmu čierui dan botta go vurde

 

Rámida

Gáski buolaš ii leat leaika, ja badjealmmái muitala ahte buollašis galgá olmmoš čájehit gudnevuollegašvuođa. Johan Persen Eira dáhtu rámidit nuoraid geat birgejedje 25 buolašgrádas.

 – Gulu mielde ledje sámi nuorat maid mátkkis, ja sii gal leat bures birgen meahcis. Sihke sápmelaččat ja áltálaččat leat hárjánan vánddardit meahcis.

 

Álttá joatkkaskuvllas leamaš odne čoahkkin ohppiiguin mas maiddái moadde váhnema oasálaste. Ávvir lea geahččalan váldit oktavuođa skuvlla rektoriin, Inger Persenin, muhto son ii leamaš olámuttos.

-Almmuhus-