Vefas/Oafir šálloša go eai leat vástidan Gilisearvvi e-boastta, eai ge áiggebále dieđihan Láhpoluobbala olbmuide ahte sii livčče Mázii sáhttán doalvut doabbariid.
– Doallá deaivása ahte mis ovdal lei dakkár ortnet ahte leat dolvon doapparkontaineriid doaresbealbáikkiide sihke giđđat ja čakčat, ja dohko leat abonnemeanttat, geat mákset doappardivada, beassan doalvut doabbariid, vástida Siw Line Thomassen, geas lea gulahallanovddasvástádus Oafiris e-boasttas Ávvirii.
Eai sáhte sihke kontainerat ja nuvttá lihput
E-boasttas čállá Thomassen ahte Oafir 2015s bijai johtui prošeavtta mainna fálle iežaset aboneanttaide Guovdageainnus (earret Máze ja Láhpoluoppal) nuvttá doalvut doabbariid goas háliidit, dainna lágiin ahte ožžo dihto meari doapparlihpuid.
– Go prošeakta ii boahtán doibmii ovdal go 2015 giđa, de dovddaimet ahte mis ii leat doarvái buorre vuođđu mearridit galgá go dát šaddat bissovaš ortnegin vai ii. Danne celkkii min stivra ahte galgat joatkit ortnegiin dán jagi lohppii, čilge son.
Viidásat čállá Thomassen ahte sii seammás áigo de fállat dán vejolašvuođa buot sin aboneanttaide, maiddái sidjiide geat orrot Mázes ja Láhpoluobbalis, nu ahte sii maid besset doalvut doabbariid goas háliidit Hánnomaras gurrenstašuvdnii Guovdageidnui.
– Dat mearkkašii ahte de eat sáhttán šat doapparkontaineriid maid doalvut dohko giđđat ja čakčat, čállá son.
Oallugat váidaledje
Go Mázes oallugat váidaledje dán ođđa ortnega, de doalvvuimet dohko dán giđa maid kontaineriid mat čužžo doppe guokte beaivvi, čállá Thomassen.
– Mii šállošit go eat leat vástidan Láhpoluoppal Gilisearvvi e-boastta, ja go eat dieđihan min 16 abonnentii Láhpoluobbalis ahte livčče sáhttán sii maid doalvut doabbariid kontaineriidda mat Mázes ledje, čállá Thomassen.
– Doapparlihppoortnet galgá árvvoštallojuvvot 2016 čavčča, ja mii váldit mielde buot mearkkašumiid árvvoštallamii, dieđiha Siw Line Thomassen Oafiris vel.
