Listhaug ii doahttal buot UNCHR rávvagiid

Norga lea sádden máŋggaid čuđiid báhtareddjiid Ruššii daid maŋimuš mánuid. Vaikko UNCHR (ON Allakommiseara báhtareddjiide) lea čielgasit dadjan ahte Ruošša ii leat oadjebas, čállá NRK.

– Mii oaivvildat ahte lea sivva fuolastuvvat, go lea sáhka Norgga meannudeami birra, earet eará Storskog rájá oktavuođas. Midjiide lea váttisvuohtan go Norga oaidná Ruošša dorvvolaš riikan báhtareddjiide, muhto ii mearkkaš ahte oaivvildit ahte ii oktage sáhte máhccat Ruššii, dadjá UNHCR Davvi-Eurohpá jođiheaddji Pia Prytz Phiri NRK:ii, maŋŋel čoahkkima Listhaugiin.

Ain fuolastuvvan

Pia Prytz Phiri dadjá UNHCR ain leat fuolastuvvan vuogis mainna báhtareddjiid meannudit Storskogas.

Árat leage UNHCR Eurohpá hoavda cealkán NTB:ii:

– Báhtareddjiidinstituhtta ii doaimma Ruoššas ja das leat stuorra váilevašvuođat. Mii eat leat ovttaoaivilis das ahte Ruošša sáhttá geahččat oadjebas riikan olbmuide geat dárbbašit suodjalusa.

NRK:ii dajai son ahte UNHCR árvvoštallá nu ahte riikkas ii leat doaibmi báhtareaddjivuogádat.

Ráđđehus ii goittot rievdat rávvehusa ahte báhtareaddjit galget máhcahuvvot Ruššii. Maiddái «Helsingforskomitea» lea cuiggodan ráđđehusa vuogi.

Ii lohpit

Listhaug dadjá čoahkkin Phirin leamaš konstruktiivalaš ja ahte son vuhtiiváldá viidáset barggus evttohusaid mat ovdanbohte čoahkkimis.

Son ii goittot sáhtte lohpidit justa dál ahte Norga boahtá čuovvut rávvagiid maid UNHCR lea buktán.

– Eai buot riikkat čuovo rávvagiid buot áššiin. Sis leat čuoggát maiguin eai leat ovttaoaivilis maiddái eará riikkain, nugo Tuiskan ja Dánmárkkuin. Ii leat daddjon ahte dan olis lea rihkkumin internašunála šiehtadusaid, go muhtimat UNHCR ovttaskas ávžžuhusain, mannet viidábut go masa mii leat geatnegahtton, dadjá Listhaug NRK:ii.

Son deattuha ahte lea dehálaš ráđđehussii, ahte báhtareddjiidrávdnji ii fas boađe johtui.