Duojár ja hábmejeaddji Lise Tapio Pittja oažžu dán jagáš Asa Kitok -stipeandda.
Sámi Duodji lea juohkán Asa Kitok -stipeandda 2005 rájes ja lea okta dain árvofámolaš stipeanddain maid Ruoŧa beale Sámi duojárat sáhttet oažžot.
Lise Tapio Pittja oažžu bálkkašumi danin go sus lea čielga ja nanu máhttu árbevirolaš duojis ja árbedieđus. Bálkkašumi sturrodat lea 75 000 Ruoŧa ruvnno.
Lise Tapio Pittja lea duddjon 35 jagi ja 2016:s son válddii meaštterreive duojis. Son lea bajásšaddan Gárasavvonis ja orru dál Johkamohkis, čállá SR Sámeradio.
Ilolaš ja giitevaš
Asa Kitok -stipeanda lea ásahuvvon muittašit giehtaduojára Asa Kitok.
– Dovdu lea nu buorre, lean nu ilolaš ja giitevaš, lohká Lise Tapio Pittja SR Sámeradioi. Sámi duodji čállá ahte Lise Tapio Pittja lea guhká bargan seailluhit sámi árbevirolaš duoji, son lea oahpahan ja veahkkin leamašan sidjiide geat leat ohcan iežaset sámi ruohttasiid.
