Oslo gávpotráđđi lea evttohan Norgga oaivegávpoga nammadit Oslove. Dasa liiko sámediggeáirras Aili Guttorm (NSR).
Sámediggeáirras Aili Guttorm (NSR) illuda go Oslo gielda viimmat oažžu ovtta sámi báikenama. Son čállá preassadieđus ahte Oslo gávpotráđijulggaštusas, mas Bargiidbellodat, Birasbellodat Ruonát ja Sosialisttalaš Gurutbellodat leat duogážis, čallo ahte gávpotráđđi sávvá oažžut dohkkehuvvot Oslove sámi báikenamman.
– Liige stuorra illun go dát stuorra ođas boahtá giellavahkku oktavuođas. Munnje, gávpotsápmelažžii, mearkkaša dát hui olu. Mun lean bajásšaddan máddin, nu ahte munnje lea Oslo sámi gávpot. Dat ahte gávpotráđđi sávvá oažžut sámi nama dohkkehuvvot čájeha ahte sii dohkkehit Oslo sámi birrasa, dadjá Guttorm.
Eat eahpit
Oslo gielda ferte vuos ráđđádallat sámedikke báikenammaossodagain ovdal go mearridit gieldda sámi nama. Muhto gávpoga sámi álbmot lea geavahan máttasámegiela namman «Oslove». – Mun jáhkán midjiide lea dehálaš muitit ahte eat dárbbaš guhkás olggobeallái Oslo mannat ovdal go gávdnjojit árbevirolaš sámi báikkit. Eat eahpit ahte sámi báikenamma lea áiggiid čađa geavahuvvon, go sápmelaččat leat dáin guovlluin ássan guhkitáigge, dadjá Guttorm
Giitevaš
– Guhkitáiggi badjel leat bargan dáinna ja mun dieđán ahte leat leamaš doarespolitihkalaš áŋgiruššamat vai ollašuvvá dát. Mun dieđán maid ahte gávpotráđis leat sámijienat bargan sakka dáinna áššin. Mun lean hui giitevaš, dadjá Guttorm.
