Nu lohká Ella Marie Hætta Isaksen, go lea vuoitán Liet International gilvvu Sámi Beassášmárkaniin Guovdageainnus.
Nu lohká Ella Marie Hætta Isaksen, go lea vuoitán Liet International gilvvu Sámi Beassášmárkaniin Guovdageainnus.
– In lean vuordán veahá ge, ledjen nu sihkar ahte in vuoitte odne eahket, lohká Ella Marie Ávvirii maŋŋil go vuittii Liet International.
Son lei álggus juo njunnošis go juryláhtut juhke čuoggáid.
– Mun dovden dego livččen geahččame Eurovision Song Contesta! Orron dego ruovttus geahččame, ja de oainnán, vuorddes, ii go diet leat mu namma, muitala vuoiti ja reašká.
Vuittii guokte vuoittu
Ella Marie Hætta Isaksen vuittii diibmá Sámi Grand Prix lávlunoasi, lávlagiin «Luoddaearru». Dainna son oassalastii maid dál.
– Lei hui somá leat lávddi alde, ja de lean hui duhtavaš. Dahken nu bures go ieš nagodin, vaikko dieđán mun álo sáhtán buoridit movt gaskkustan iežan dovdduid ja lávlunteknihka.
Ella Marie ii vuoitán duššo Liet International lávlungilvvu.
Gilvvus juhket guokte bálkkašumi, vuosttaš lea jury bálkkašupmi mas lea árvu 2000 euro. Nubbi fas artisttaid bálkkašupmi, man artisttat ieža gaskaneaset jienastit, ja das lea árvu 1000 euro.
Go gilvvu láidesteaddji Ante Siri jearai masá áigu 3000 euro geavahit, de son vástidii ahte háliida šaddat artistan.
– Oallugat doivot mun rikkun go lean artista, ja nu maid orru go vuoittán, muhto lea hui divrras leahkit artista. Ruđat bohtet dasa mannát, muitala Ella Marie Hætta Isaksen.
Vuittii ruovttus
Dál lei maŋemuš háve go Liet International musihkkagilvu lágiduvvui olggobeale Frieslándda. Gilvu lea johttán iešguđet giellaguovlluin, ja lea vuohččan guovddáš sámis.
– Lea liiggás somá vuoitit go gilvu lea Guovdageainnus! Mun oainnán eatni, áhči, goaski, unnaoappáža, ja iežan olbmáid! Dat lea nu somá beassat lávlut go buot mu lagamusat leat das, ja moddjájit munnje, mis lea buohkain de somá.
Liet International gulahallanolmmoš Tjallien Kalsbeek mielas lei buorre go mearridedje sámis lágidit gilvvu, seammás go Beassašfestivála lea.
– Lei hui erenoamáš, muhto lei buorre válga mis. Artisttaide lea hui eksohtalaš vuolgit deike, ja veahá eará go masa leat hárjánan. Lei buorre go mearrideimmet dáppe lágidit dán jagi.
Lea ilus go ii lean juryláhttu
Liet International gilvvus ledje oktiibuot gávcci oasseváldi, mat bohtet gávcci iešguđet giellaguovlluin Eurohpás. Liet International lea unnitloguid gielaid musihkkagilvu, ja lea vuolgán Frieslánddas. Sápmi lea máŋgii ovdal oassálastán, ja lea vuoitán njelljii ovdal.
Liet International gulahallanolmmoš Tjallien Kalsbeek sávvá Sápmái lihku vuoittuin.
– Lean ilus go in lean jurymiellahttun, go buohkat ledje nu čeahpit. Jáhkán ahte lei váttis válljet vuoiti.
Kalsbeek liikui maid sámi lávlagii.
– Son lea hui čeahppi, joavku lea čeahppi čuojahit, ja ovttas leat hui buorit, lohká son.
Bures mannán
Son guhte Sámi musihkkafestivála ovddas lea koordineren Liet International gilvvu lea Brita Triumf.
– Manai hui bures, lea leamaš garra bargu, ja olu guossit maid boahtán, muhto lean hui duhtavaš. Dat mii mu mielas lei hui erenoamáš somá, lea go Frieslánda oaččui oalle alla čuoggá sámis, ja fas attii sápmái alla čuoggá vai Sápmi vuittii gilvvu! lohká Triumf.
Liet International gilvvu sáhttá buohtastahttit Sámi Grand Prix gilvvuin, muhto eai lean boahtán lihka olu geahččit go Sámi Grand Prixas lávejit. Ledje oalle olu guoros stuolut Báktehárjjis.
– Lea váttis einnostit olu olbmot bohtet go lea ođđa lágideapmi, ja olbmot eai soaitte riekta diehtit mii dat lea. Bohte dan mađe olbmot go leimmet rehkenastán. Guoros stuolut ledje go leimmet bidjan eambbo stuoluid, jus dette bohtet eambbo go maid leimmet einnostan.
Juoigangiehta Udmurt oasseváldis.
Brita Triumf mielas lei erenoamáš oktavuohta buot oasseváldiin, go buohkat lávlo iežaset gillii. Liet International gilvvus ii leat lohpi lávlut eaŋgalasgillii.
– Dovdo ahte leat unnitlogu gielaid olbmot, sisdoallu lávlagiin lea álbmoga ektui, dovdduid ektui. Giella lei buohkaide hui dehálaš.
– Mu mielas lei hui fiinnis Udmurt lávlla man Pavel Aleksandrov ja Dmitry Yakimov lávlluiga. Das lei dego luohti loahpas, ja sus lei vel juoigangiehta vel. Dat gullá ge maid seamma giellajovkui go sámegiella, muitala Triumf.