Guovdageaidnu suohkan lea gearggus máksit liige doarjaga sidjiide geat ožžot sosiálaveahki suohkanis.
Stuoradiggi mearridii juovlamánu 15. beaivvi 2022 lasihit rámmadoarjaga suohkaniidda 100 miljovnna ruvnnuin dainna jurdagiin ahte addit 1 000 ruvnno liige doarjaga sidjiide geat ožžot sosiálaveahki, ja 1 000 ruvnno vel lasi juohke máná nammii.
– Stuoradikki mihttu lea addit sidjiide geat ožžot sosiálaveahki liige mávssu juovlamánus, dat liige máksu ii dagat ahte gesso fas eará doarjagiin.
Mihttojoavku dan máksui leat buohkat geat leat ožžon dahje ožžot ekonomalaš sosiáladoarjaga juovlamánus 2022.
Guovdageainnu suohkan bidjá vuođđun ahte buohkat geat leat dan mihttojoavkkus háliidit dan liige mávssu. Dat ii leat dárbu sáddet ođđa ohcama sidjiide geat juo leat ohcan sosiáladoarjaga juovlamánus, čállá Guovdageainnu suohkan ruovttosiiddus.
Máksináigemearit
Áigemearri sáddet ohcamiid digitála skovi bokte, ja mat galget máksot ovdal juovlaruohta, lea bearjadaga 23.12.22 dii. 12:30. Ohcámat sosiáladoarjagii mat bohtet sisa áigemeari maŋŋel eai boađe máksot ovdal 27.12.22. Dat lea biddjon báŋkkuid máksináigemeriid vuođul.
Ohcanáigemearri digitála skovi bokte, ja mat galget máksot ovdal ođđajagiruohta, lea bearjadaga 30.12.22 dii.12:30. Sosiáladoarjjaohcamat mat bohtet áigemeari maŋŋel eai boađe máksot ovdal 02.01.2023. Dat lea biddjon báŋkkuid máksináigemeriid vuođul, čállá suohkan.
