-Almmuhus-
-Almmuhus-
OĐĐASAT Liigečoahkkimis digaštallet dáiddaguovddáža bargodili

Liigečoahkkimis digaštallet dáiddaguovddáža bargodili

-

-

Sámi Dáiddačehpiid Searvvis lea ihttin liigejahkečoahkkin beaggimiid geažil mat leat leamaš Sámi Dáiddaguovddáža bargodili birra.

 – Lea boahtán ovdan medias ahte guokte bargi Sámi Dáiddaguovddážis leaba buohccindieđihuvvon guhkit áigái ja šaddan gillát bieguhemiid direktevrra bokte. Mii dovdat iežamet geatnegáhtton reageret dása go guovddáš lea leamaš min oamastusas gitta diimmážii go šattai sierra vuođđudussan.

Dan dadjá dáiddár Synnøve Persen, guhte lea okta dain miellahtuin geat leat gáibidan Sámi Dáiddačehpiid Searvvi lágidit liige jahkečoahkkima.

 

Olu oaivilat

Iežaset njuolggadusaid mielde galgá Sámi Dáiddačehpiid Searvi lágidit liige jahkečoahkkima jus okta logádas oassi miellahtuin gáibidit dan, ja dákkár čoahkkimis ii galgga gieđahallot eará go dat ášši man nammii čoahkkimii lea gohččojuvvon.

Synnøve Persen muitala ovcci miellahttu gáibidan čoahkkima dollot vai besset digaštallat maid searvi sáhttá dahkat dainna diliin mii lea čuožžilan Sámi Dáiddaguovddáža (SDG) bargoveagas. 

 – Dán áššis leat máŋggalágan oaivila SDS miellahtuid gaskkas, ja mii boahtit digaštallat maid SDS sáhttá dahkat dáinna diliin ja sáhttá go dahkat maidege obage, čilge Persen.

 

 – Sáhttá bat SDS dahkat maidege dán áššis?

 – Na liige jahkečoahkkin sáhttá dieđusge buktit ávžžuhusa SDG stivrii ahte mo galggašedje gieđahallat dán ášši. Min searvi han nammada golbma stivrraláhttu SDG stivrii ja sidjiide sáhttit maid buktit ávžžuhusaid, dadjá Persen.

 

Ii leamaš oktavuođas

Gieskat čálii NRK Sápmi ahte dáiddaguovddážis galget máŋga bargi leat riiddáskan guovddáža direktevrrain Hjørdis Kuråsain.

 – Daid bargiid birra eat sáhte gal digaštallat, eat ge mii dieđe eanet dan dili birra go dan mii lea medias boahtán ovdan. Muhto dát leat váikkuhan SDG dillái obbalohkái, oaivvilda dáiddár.

Son ii loga gal iežaset leamaš oktavuođas bargiiguin geat galget leat riiddus, eai ge SDG:in.

 – Muhto juohkehaš ádde ahte go olbmot leat bargguideaset gártan guođđit de dasa fertejit leamaš nana sivat. Dan eat dárbbaš jearrat álgit, dadjá Persen.

 

– Ártet jus vuođđudit oaiviliidáset márkanságaiguin eai ge faktadieđuiguin.

Hjørdis Kurås, Sámi Dáiddaguovddáža direktevra

Imašta

Sámi Dáiddaguovddáža direktevra Hjørdis Kurås ii loga iežas gullan ge dán liige jahkečoahkkima birra.

– Mun in dieđe dien čoahkkingohččuma birra maidege, muhto mu mielas lea ártet jus ležžet doallamin liige jahkečoahkkima eai ge leat gulaskuddan minguin. Ártet jus vuođđudit oaiviliidáset márkanságaiguin eai ge faktadieđuiguin, dadjá Kurås ja muitala iežas maiddái sádden čilgehusa SDS stivrii.

Čilgehusas lea muitalan mo son lea vásihan SDG dili dan rájes go álggii direktevran.

 – Olu áššit leat leamaš váddásat, mieđiha son.

 


SDG DIREKTEVRA: Hjørdis Kurås
Vuorkágovva: Astrid Helander

 

Bargonoađđi čuohcá

Kurås ieš lea čađat šiitán ahte SDG:s livčče makkár ge riidu bargiid gaskkas. Son jáhkká baicce lossa bargonoađi čuohcan buot bargiide.

– Lean geahččan 2012:i jahkedieđáhusa. Dalá direktevra lea jo čállán ahte SDG bargoveahka lea menddo unni. Das rájes leat mii máŋgga geardde duppalastán čájálmaslogu seammás go bargoveahka lea unnon. Dat diehttelasat dagaha olu barggu juohkehažžii ja nu lea dat čuohcan buohkaid, čilge Kurås.

Direktevra muitala maid bargovugiid rievdan dan rájes go guovddáš fárrii ođđa visttiide.

 – Muhtin praktihkalaš bargovugiiguin eat oba sáhttán ge joatkit go fárriimet deike, ja sidjiide geat guhká leat bargan guovddážis sáhttá dieđusge leamaš lossat oahppat ođđa bargovugiid, muitala son.

 

– Ii leat SDG bargodili birra

Sámi Dáiddačehpiid Searvvi jođiheaddji Marita Isobel Solberg lohká ná ihtá liige jahkečoahkkima birra:

 – Dát čoahkkin ii leat SDG bargodili birra dieinna lágiin, mii eat sáhte digaštallat persovdnalaš áššiid nu mo dáid birra lea čállon mediaid bokte. Mii sáhttit digaštallat mo SDS háliida ahte SDG galggašii doaibmat. 

Son muitala searvvi leat duhtavaš iežaset golmma stivrraláhttu bealis maid leat nammadan SDG stivrii, ja oaivvilda dán golbmasa dahkat buori barggu.

 – SDG stivra dat gieđahallá bargoaddiovddasvástádusa ja SDG bargiid. Dasa lassin lea sihke liige ja dábálaš jahkečoahkkin SDS miellahtuid várás iige Ávvira ja eará guldaleddjiid várás, dadjá Solberg guhte ii oaivvil dán leat mediaáššin.

 

– Measta heahpat

Iige son leat duđavaš dainna mo mediat leat gieđahallan SDG ášši.

– Mu mielas dat ii leat mediaášši, ja obbalohkái lea mu mielas media hejot gieđahallan SDG bargodili ášši. Sii leat lebben sihke persovnnalaš, priváhta ja konfidensiella áššiid álbmogassii, ja lea measta heahpat go ná leat dahkan, oaivvilda son.

SDS jođiheaddji lohká iežaset buktit cealkámušaid mediaide maŋŋil vahkkoloahpa čoahkkimiid.

 

- Advertisement -
-Almmuhus-