Sámiid Duodji gudnebálkkášupmi 2019 geigejuvvui Maja Hilma Dunfjeldii.
Riikkaorganisašuvdna Sámiid Duodji atti 2019:i Gudnebálkkášumi Maja Hilma Dunfjeldii (f.1947), son orru Harranis Trøndelágas. Gudnebálkkášumi attii organisašuvdna sin jahkečoahkkimis mii lei Gardermoenis golggotmánu 5. ja 6.beaivve.
Háliidan addit juoidá ruovttoluotta
Maja Dunfjeld oaččui ge bálkkašumi su stuorra ja guhkit áigge beroštumis vætnoe/duojis. Gudnebálkkašupmi juolluduvvo duojárii geasa mearkkaša ja lea mearkkašan olu nannet, ovdánahttit ja sihkkarastit duoji fievrrideamen boahtte bulvii. Dunfjeld lea dahkan nana áŋgiruššama duođaštit ja juohkit hervendáidda giela ja máttasámi duoji dego vuoiŋŋalaš kulturárbin boahttevaš buolvvaide.
– Mun lean lihkolaš go lean ožžon vejolašvuođa váldit oasi duoji muitaleddjiid gelbbolašvuođas ja hervendáidda gielas, dan buori vuostáiváldimis maid ožžon muitaleddjiiguin sin duodjegelbbolašvuođas. Go ožžon ná buori vuostáiváldima de dat dagai ahte háliidin addit juoidá ruovttoluotta sidjiide geat leat juohkán sin gelbbolašvuođa min oktasaš duodjeárbbis, logai vuoiti gudnebálkkašumis Maja Hilma Dunfjeld maŋŋá bálkkašupmegeigema.
Čállán girjjiid
Dunfjeld duođaštusbargu šattaige doavtterdutkamuš duojis ja ilmmai ge girjin Tjaalehtjimmie – ornamentikkens språk, mii almmuhuvvui 2006:s.
2018:s almmuhuvvui girji Aerpiemaahtoe – Åarjelsaemien duedtien baakoeh (Árbejuvvon máhttu máttasámi duodjesátnegirji), gos son lei redaktevra ja váldogirječálli.
Vuđolaš čilgehus
Riikkaorganisašuvdna Sámiid Duodji čilge vuđolaččat sin preassadieđáhusas manne Maja Hilma Dunfjeld ánssáša gudnebálkkašumi.
«Maja H Dunfjeld lea áŋgir ja sus lea vætnoe/duodji gelbbolašvuođariggodat maid son gaskkusta. Maja lea oahppan duodjeoahpaheaddji Stáhta oahpaheaddjeskuvllas, gos son oahpai giehtaduoji ja sus lea doavttergráda dáiddahistorjjás Universitehtas Romssas, gos son lokti “giela”, hervendáidda giela. Son lea maid leamaš jođiheaddji riikkaorganisašuvnnas Sámiid Duodji, duodjebagadalli máttasámiguovlluin, lektor Sámi allaskuvllas ja beaivválašjođiheaddji Duodjeinstituhtas Guovdageainnus. Dan maŋimuš áiggi lea son leamaš beaivválašjođiheaddji Sijti Jarnge Aarbortes. Dego oahpaheaddji ja bagadalli duojis ja čohkkemis ja publikašuvnnat árbevirolašmáhtus lea son váikkuhan duođaštit, seailluhit ja fievrridit viidáset máttasámi duoji boahttevaš buolvvaide. »
Gudnebálkkašupmi
Gudnebálkkašupmi geigejuvvo riikkastivrras juohke nuppi jagi Sámiid Duodjeriikkačoahkkimis ja 2015:s geigejuvvui dát bálkkašupmi vuosttaš geardde. Bálkkašumi vuoiti 2015:s lei Mary Mikalsen Trollvik, Gáivuonas Romssas ja 2017:s oaččui unjárgalaš Per Andersen bálkkašumi. Riikkaorganisašuvdna Sámiid Duodji ávvudii sin 40 jagi ávvudeami riikkačoahkkimis. Organisašuvdna Sámiid Duodji vuođđuduvvui borgemánu 17.beaivve 1979.
