Sámediggepresideantta Silje Karine Muotka Sámi álbmotbeaivvi dearvvuođat Sápmái.
Odne mii ávvudat min iežamet, oktasaš álbmotbeaivvi. Sámi álbmotbeaivi lea badjel 30 jagi ja lea šaddan dehálaš ja lunddolaš ávvubeaivin sihke Sámis ja maiddái muđui stuorraservodagas. Munnje lea njuorasmahtti ja buorre vásihit mo erenoamážit min mánát ja nuorat besset leat guovddážis dán beaivvi ja dieđán ahte sihke mánáidgárddiin ja skuvllain ávvuduvvo bures sihke odne ja miehtá dán vahkku ja mánu. Sávan min mánáide ja nuoraide buori muittuid ja vásáhusaid álbmotbeaivvi oktavuođas.
Háliidan maid giitit sámi servodaga, eaktodáhtolaš searaid, sámi servviid ja ásahusaid mat váldet badjelassii barggu lágidit doaluid vai min olbmot besset čoahkkanit ja ávvudit fárrolaga. Ii livčče vejolaš čađahit nu fiinna doaluid din haga ja dii dahkabehtet dehálaš barggu maiddái čalmmustahttit sámevuođa sihke báikkálaččat ja našunálalaččat. Sámi servodat lea ieš bidjan áiggi ja návccaid hukset min álbmotbeaivvi dehálaš ja allaárvosaš ávvudeapmin ja mun lean nu rámis iežan álbmoga áŋgirruššama ovddas.
Sámi servodatovdáneapmi lea dego maratona viehkat, ovdalgihtii dieđát ahte lea guhkes mátki ja olmmoš ferte vuoruhit iežas návccaid vai ii oalát gahča ovdal go olle lohppii. Mis leat ollu hástalusat ain, muhto odne háliidan ahte mii buohkat ávvudit ja illudit buot dan mii lea buorre ja vuoitun min servodagas. Mun bealistan ávvudan odne min erenoamáš rikkis ja máŋggabealat Sámi, min gielaid, min kultuvrra, min duoji ja dáidaga, min ealli ealáhusaid ja ceavzima.
Odne mun ávvudan din buohkaid geat lehpet Sápmi. Lihkku beivviin!
