– Lihkkosávaldagaiguin eat nagot lágidit gilvvuid

Duottar Hearggit lea okta dain báikkálaš heargevuodjinservviin mat leat Sámi Heargevuodjinlihtu miellahtut. Searvi lea Guovdageainnus ja sis leat birrasii 30 miellahtu, ja máŋgalogi gilvohearggi mat gilvvohallet searvvi namas. Sis eai leat nu olu ruđalaš fámut, go sii eai oaččo doarjaga gos ge doaimmahit gilvvuid, eambbo lihtus maid doppe juolludit ain gilvvuide.

Biehttaledje doarjumis

Duottar Hearggit searvi lea ráhkadan sámi áidna gilvošilju Guovdageidnui, gos lágidit máŋggaid gilvvuid, earret eará beassášlávvordaga, go lea sihke heargegilvvut ja maid njoarostangilvvut doppe. Dan gilvošiljus FeFo gáibida 29 265 ruvnno eananláiggu jahkásaččat. Duottar Hearggit ledje ohcan FeFo oažžut vuoliduvvot dan ja maid eará ládje doarjut sin, muhto FeFos biehttaledje doarjumis, eambbo sávve lihku ain viidáset.

Dárbbašit ruđa

– Eat mii lihkkosávaldagaiguin nagot gal galle gilvvu lágidit. Mii juo rahčat ekonomalaččat, ja lea váidalahtti go FeFo ii doarjjo min,

lohká Duottar Herggiid nubbijođiheaddji, Mikkel Andreas Eira.

Son lohká sii leat dáid beivviid árvvoštalláme galle gilvvu suitet lágidit, go lea divrras šilju ordnet vai lea gilvvohallanládje.

Vihtta searvvi

FeFo eanan- ja riekteossodaga hálddašeaddji, Jim Einar Roska, duođašta ahte sii leat vuolidan viđá searvái eananláiggu, nu lea šaddan sidjiide oktiibuot 41 252 ruvnno hálbbit jahkásaččat. Searvvit leat Mátta-Várjjat riidensearvi, Kirkenes Ryttersportklubb, guokte šilju Tanahall AS, ja Alta Golfklubb.

 – Dat ávžžuhus bođii Finnmárkku Falástallanbiirres, gos sii oaivvildedje lea beare alla eananláigu muhtun servviide, ja FeFo mieđai dasa ja unnidii láiggu daidda servviide, muitala Roska.

Beliin unnidedje láiggu

Lea unna searvváš, Mátta-Várjjat riidensearvi, geat ledje okta sis geat oažžo vuoládusa eananláiggus. Sii mákse 5000 ruvnno ovdal vuoládusa, ja dál mákset 2800 ruvnno. Eanemus eananláigu lea Alta Golfklubbas, ja sii mákse 46 390 ruvnno ovdal vuoládusa.

 – Jus oaivvildit Duottar Hearggit ahte mii leat boastut bargan, de ávžžuhan sin fas sáddet ohcama, ja mii de geahččat ođđasit ášši, lohká Roska.

Nuvttá eananláigu

Sámi Heargevuodjinlihtu jođiheaddji, Mikkel Per Sara, imaštallá go FeFo han galggašii ovddidit sámi doaimmaid, muhto liikká eai doarjjo áidna ráinnas sámi falástallanšilju.

 – Mu mielas berrešedje nuvttá láiggu addit Duottar Hearggit searvái, ja dan gáibidan mun Sámediggi galgá maid ovddidit FeFo stivraáirasiid bokte ja maid strategiijaplána bokte, lohká Sara, ja lasiha vel:

 – Muđui orru ain Sámedikkis dat vuoigŋa ahte eai doarjjo báikkálaš servviid mat lea Sámi Heargevuodjinlihtu miellahtut.

Ii strategiijaplánas oassi

Sámedikki ráđđeláhttu, Silje Karine Muotka, ii loga dovdat ášši, muhto lohpida čuovvolit ášši. Son ii loga maid Sámi heargevuoddjiima erenoamažiid namuhuvvon strategiijaplánas.

– Mii luohttit ahte Sámedikki áirasat FeFo stivrras doaimmahit barggusteaset bures, muhto mun lohpidan iskat ášši movt lea šaddan, lohká son.