Romssa fylkkasuohkan levgii vuosttaš gearddi kvenaleavggain kvena álbmotbeaivvi njukčamánu 16. beaivvi.
Romssa fylkkasuohkan levgii vuosttaš gearddi kvenaleavggain kvena álbmotbeaivvi njukčamánu 16. beaivvi.
Odne ávvudit kvenat álbmotbeaivvi miehtá Norgga.
Njukčamánu 16. beaivi lea válljejuvvon go dán beaivvi 1984:s ásahuvvui vuosttaš báikkálaš kvenaid organisašuvdna.
Dát dáhpáhuvai Bissojogas, Porsáŋggu gielddas.
Leavga
Diibmá dohkkehuvvui kvenaálbmoga leavga man Bengt Johansson-Kyrö lea hábmen. Leavga ii leat almmolaš, muhto dainna oažžu levget.
Leavggas lea fiskes lieđđi mii lea gávdnon olu dávviriin kvenaguovlluin sihke Suomas ja Ruoŧas.
Romssa fylkkasuohkan levge kvenaleavggaid vuosttaš gearddi.
– Mii dáhttut čalmmustahttit kvena álbmotbeaivvi Fylkadikkis go kvenakultuvra lea dehálaš oassi min guovllu kulturárvvus, dajai fylkkasátnejođiheaddji Knut Werner Hansen go rabai Fylkadikki čoahkkima odne.
Stádaministtar ávvuda
Kvenat ávvudit ja čalmmustahttet álbmotbeaivvi iešguđetlágan kulturdoaluin.
Álttás čoahkkanit kvenat Álttá museas, ja dohko boahtá maiddái Norgga stádaministtar Erna Solberg.
Son čuovvu doaluid, doallá sártni ja kvena searvvit besset ságastallat stádaministariin.
