Son lea geahččalan vuoitit Saami Ski Race čieža geardde, ja maŋemus jagiid lagabus ja lagabus golli leamaš, de son viimmat olihii iežas mihtu. – Jus livččii vel vihtta kilomehtera leamaš mátkkis, in lean soaitit šat nagodit čuoigat, logai vuoiti dakka maŋŋel go lei mollii ollen.
Son lea geahččalan vuoitit Saami Ski Race čieža geardde, ja maŋemus jagiid lagabus ja lagabus golli leamaš, de son viimmat olihii iežas mihtu. – Jus livččii vel vihtta kilomehtera leamaš mátkkis, in lean soaitit šat nagodit čuoigat, logai vuoiti dakka maŋŋel go lei mollii ollen.
Dán jagáš Saami Ski Race gilvvus, mii lágiduvvui lávvordaga cuoŋománu 1. beaivvi, ii lean okta ge stuora čuoigannásti, ja dat rabai geainnu de earáide gilvalit golli alde.
Daniel Strand lea čieža geardde searvan Saami Ski Race gilvui, ja dál lei viimmat su vuorru vuoitit.
Lossat
Ovdal gilvvu almmuhii ge Ávvir Daniel Stranda hui jáhkehahttin vuoitit dán jagáš Saami Ski Race 90 kilomehter mátkki, ja nu manai maid, muhto ii lean gal goitge moalas eambbo minuhta ja 24 sekundda ovdalis Magne Henriksena, gii nubbin bođii 90 kilomehter mátkkis.
– Gal dat lei nu lossat. Ii okta ge oassi láhtus lean geahpas odne. Jus livččii vel leamaš vihtta kilomehtera mátki čuoigat, de in lean soaitit oba nagodit ge šat, lohká Daniel Strand Ávvirii nu movt ollii mollii.
Viimmat
Strand lei ilus go vuittii, ja logai erenoamáš somán leat go son lea nu olu jagiid geahččalan, ja lea dušše lagabui ja lagabui beassan golli.
– Mun in vuoitte nu olu čuoigangilvvuid, nu ahte lei hui somá fas vuoitit. Lei várra mu vuorru dál, erenoamážit go lean buorebut ja buorebut čuoigan daid maŋemus jagiid dáppe, lohká son.
Strand ádjánii 4:15:08, mii lea badjelaš 21 minuhta heajut áigi go sus lei diibmá go bođii nubbin.
Njunnošis álggu rájes
Strand lei ovddemusas dakkaviđe go čuoigájedje Guovdageainnus, ja son doalahii doppe čađat.
Son čuoiggai visot 90 kilomehtera akto, ja eanamus lei birrasii 6-7 minuhta ovdalis sin geat maŋis ledje.
Moalas son ii lean šat eambbo minuhta ja 24 sekundda ovdalis.
Bargan 90 kilomehtera
– Gal lei duođai lossat. Lean šaddan bargat čađa gaskka. Sabehat mus gal ledje buorit, muhto láve go guhkemátkki čuoigá, ahte doppe dovdo rumaš muhtumin hui buorren ja nagoda čuoigat johtilit, ja fas nuppi vuoru šaddá lossadin. Dál lei lossat čađat. Ledjen várra eanemus 6-7 minuhta ovdalis sin geat maŋis bohte, ja dál gal leat várra dakka maŋis, dajai son njuolga maŋŋel go joavddai mollii.
Ja nu lei ge, dakka maŋis iđistedje guokte čuoigi, Magne Henriksen, gii nubbin bođii, ja bronsavuoiti ruoŧŧelaš Mats Riekkola.
Bohtosat
Dáppe sáhtát Saami Ski Race bohtosiid geahččat:
90 kilomehter dievddut/nissonat
60 kilomehter dievddut/nissonat
30 kilomehter dievddut/nissonat
