Tråante lágideaddjit duođaštit ahte duššan olmmái lei Tråante 2017 oasseváldi, muhto ii lean bovdejuvvon guossi.
– Mii eat áiggo vuos maidege dahkat ášši dáfus. Áidna mii lea sihkar lea ahte doalut mannet dego dábálaččat, ja mun jáhkán nu dat ferte maid dahkkot, lohká Tråante 2017 doaluid prošeaktajođiheaddji, Ida Marie Bransfjell.
Eai čalmmustahtte
Bransfjell ii loga sin moktege čalmmustahttet dáhpáhusa.
– Eat goit daga maidege dál ovdal go duššan dievddu nama leat almmuhan. Maid de dahkat, dan šaddat oaidnit dasto, lohká son.
Fárrolaga leat
Son maid lohká ahte lea lagamuččaide lossat, ja dat leat ipmirdeames.
Olmmái lei máttasápmelaš.
Bransfjell lohká ahte soaitá maid leat buorre go leat nu olu sápmelaččat čoahkkanan, ja besset fárrolaga leat dákkár dáhpáhusa oktavuođas.
– Soaitá oapmahaččaide maid veahá jeđđehus ahte mii eat rievdat maidege, muhto leat fárrolaga dál dáppe, lohká Bransfjell vel loahpas.
