Politiijat leat dál almmuhan nama nissonolbmos gii láhppui ja jámii vázzinmátkkis Sállanis, muhto eai sáhte vel muitalit siva birra.
Erna Soo-Ryun Kristensen, Álttás eret, lei vázzinmátkkis Sállanis go skoaddu badjánii. Son dieđihuvvui láhppon diibmu 00.30 sotnabeaiija. Ohcamat čađahuvvo birrajándora, sihke áimmus, mearas ja nannámis gitta maŋŋebárgii, dalle gávdne su jápmán, gaskal diibmu 13.00 ja 14.00.
Eai dieđe siva
Politiijat eai sáhte justa dál muitalit mo son jámii.
– Ii leat vel čielggaduvvon, ferten gullat vuos sis geat leat jođiheamen dutkama, ferte vuos rumašrahpan dahkkot. Dan maŋŋá oažžut raporta dan birra. Eat várra beasa diehtit siva odne gal vuos. Soaitá ihttin, muitalit Finnmárkku politiijaguovllus.
Giitá veahki ovddas
Dá lea oassi maid Finnmárkku politiijameasttir Ellen Katrine Hætta lea čállán iežas almmolaš Facebook-siidui: «Ozaimet nissona máŋga jándora, ja mun jurddašan vuosttažettiin jápmán nissonolbmo bearraša birra. Mis lei doaivva ahte galggaimet gávdnat su heakkas, muhto nu ii geavvan. Háliidan giitit buohkaid geat ledje mielde dán hui viiddis ohcamis.»
