– Leat gohčoduvvon korruptan

– Mii leat gohčoduvvon korruptan ja bealálažžan. Čuoččuhuvvot korruptan lea oalle duođalaš, ja in jáhke olbmot jurdilit maid dat oba mearkkašage. Dat mearkkaša ahte mii galggašeimmet leat vuostáiváldán ruđaid soapmásis, vai dahkat mearrádusaid sin miela mielde, njulgestaga oston, lohká Finnmárkku Fylkkamánne boazodoalloossodaga Oarje-Finnmárkku vuolitdirektevra Adam Klemet Hætta.

Boazodoalu árgabeaivvi dutkamis boahtá ovdan ahte dušše 34 proseantta boazodolliin lohket báikkálaš boazodoallokantuvrrain buori máhttu ja bures veahkehit ja nevvot go váldet oktavuođa.

47 proseantta lohket oažžut belohahkii veahki ja 19 proseantta eai loga báikkálaš boazodoallokantuvrrain veahki ja neavvagiid go váldet oktavuođa.

Dušše 17,5 proseantta lohket dan seamma guovddáš boazodoallohálddahusa birra.

34 proseantta eai loga luohttit boazodoallostivrii eai ge guovddáš boazodoallohálddahussii.

Logut čájehit ahte boazodoallit leat eanet positiivva báikkálaš hálddahussii go guovddáš hálddašanorgánii.

Leat beali eambbo olbmot geat lohket buoret vásáhusaid báikkálaš kantuvrrain go guovddáš hálddašanorgánain.

Gohčoduvvon korruptan

Finnmárkku Fylkkamánne boazodoalloossodaga Oarje-Finnmárkku vuolitdirektevra Adam Klemet Hætta, ii loga lohkan dutkanraportta, muhto muitala logut orrot doallame deaivása sin vásáhusaid ektui.

Hætta ii loga sin vuohttit ahte sidjiide lea eahpeluohttámuš boazodoalus, muhto muitala sii leat vásihan garra čuoččuhusaid cuigejuvvot sin vuostá.

Dutkan čájeha maiddái ahte dušše birrasiid 3 proseantta oaivvildit almmolašvuođas (stáhtas/gielddain) leat máhtu boazodoalu birra, ahte almmolašvuohta atná boazodoalu dehálažžan ja ahte boazodoallu oažžu seamma doarjaga ja gáhttema go eará ealáhusat.

74 proseantta oaivvildit boazodoalu čielgasit vealahuvvot eará ealahusaid ektui, 24 proseantta oaivvildit ges belohahkii vealahuvvot.

Loga maid: Olgguldas áššit giksin boazodolliide

Loga maid: – Bohccuid luhtte vajál­duhttá buot nođiid

Garra sátnegeavaheapmi

Hætta ii loga goitge goassige konkrehtalaččat cuiggoduvvon mo sii galggašii leamaš oston, eaige leat sii dahje geat leat buktán čuoččuhusaid goassige mannan viidáseappot čuoččuhusain.

– Mun gal ipmirdan muhtumin sáhttá olmmoš heađástuvvat go gáržžohallat go ii oro manname miela mielde, ja vel go mii meaddit. Mii gal sáhttit meaddit, muhto de mii álo geahččalit njulget go mii han fertet lágaid čuovvut. Hætta oaivvilda ahte boazodoalus sáhttá leat garra sátnegeavaheapmi, ja ii sáhte buot váldit nu duođas mii daddjo ja nu leat sii šaddan gierdevaččat čuoččuhusaid vuostá.

– Dat mii guoská bealálašvuhtii, de leat lágat ja njuolggadusat maid mii almmolaš ásahusas fertet čuovvut, lohká Hætta.

–Sáhttá ieš smiehttat manne

Norgga boazosápmelaččaid riikasearvvi nubbijođiheaddji, Per John Anti lohká lea álki ipmirdit manne ii leat unnán luohttámuš.

– Go čájehuvvo boazodolliin lea unnán luohttámuš eiseválddiide, de ferte geahčestit nuppe guvlui. Gáibádus unnidit ealuid, seammás go luvvejuvvojit sajit sisabahkkemiidda nu movt ruvkedoaimmaide, el-fápmolinnjáide ja bieggamilluide. Dasa lassin lea vel boranávdepolitihkka dan láhkái ahte doppe galget gávdnot boranávddit gos boazodoallu lea. Go dieid geahččá oktii de ii leat nu váttis smiehttat manne ii leat luohttámuš daidda geat mearridit, lohká Anti.

Dutkan čájeha ge ahte measta buot boazodoallit, 92-95 proseantta ellet ovttain dahje eambbo sisabahkken sorttain mat dagahit hušša ja/dahje lassibarggu sidjiide.

Eatnašat 70-71 proseantta, ges ellet unnimusat njeljiin iešguđet sisabahkken sorttain mat dagahit hušša ja/dahje lassi barggu.

Sisabahkkemat dán oktavuođas leat ge earret eará iešguđet lágan huksemat, máđiijat ja  ráfáiduhtton boraspiret.

Doaimmaid bidjat johtui

Anti lohká sii dán dutkanraportta bohtosiid vuođul áigot bidjat doaimmaid johtui mat galget buoridit dili boazovázziide.

– Mii fertet oažžut johtui doaimmaid mat geatnegahttet stáda ja eiseválddiid. Dat dieđusge ii leat álkis bargu, muhto dat raporta šaddá ávkkálaš dan bargui, lohká Anti.