-Almmuhus-
-Almmuhus-
OĐĐASATLeat go vuol­gime mátk­koštit juov­llaid? Dá leat njuolg­gadusat maid fertet diehtit

Leat go vuol­gime mátk­koštit juov­llaid? Dá leat njuolg­gadusat maid fertet diehtit

-

-

Oallugat háliidit mátkkoštit juovllaid, fitnat bearraša dahje oahppásiid luhtte bassebeivviid. Muhto dieđát go makkár njuolggadusat leat gustovaččat go mátkkoštat Ruŧŧii dahje Supmii?

Ruoŧa ráđđehus lea mearridan ásahit mátkkoštannjuolggadusaid mat gusket buohkaide geat mátkkoštit Ruŧŧii.

Juovlamánu 21. beaivvi rájes ferte dus leat gustovaš koronapássa mii čájeha ahte leat ožžon guokte dahje golbma koronaboahku dahje ahte dus lea leamaš koronadávda unnit go guđa mánu áigi, jus galggat mátkkoštit Ruŧŧii.

Jus dus ii leat koronapássa, de ferte dus leat duođaštus mielde mii čájeha ahte leat váldán PCR- dahje jođánisiskosa iskkusstašuvnnas unnit go 72 diimmu ovdal go bohtet Ruoŧa riikarádjái.

Ruoŧa Álbmotdearvvašvuođainstituhtta ávžžuha vel buohkaid váldit PCR-iskosa nu jođánit go bohtet Ruŧŧii.

Ruoŧa politiijat galget dárkkistit rádjeguovlluid ja ávžžuhit ahte mátkkošteddjiin lea gustovaš pássa dahje eará ID-dokumeantta mii duođašta gii don leat.

Mátkkoštannjuolggadusat leat gustovaččat buohkaide geat leat badjel 18 jagi boarrásat.  Vuollel 18-jahkásaččat eai dárbbaš čájehit koronapássa dahje duođaštit negatiiva koronaiskkusbohtosa. Maiddái sii geat boazobargguid oktavuođas mátkkoštit Ruŧŧii besset spiehkastit sisamátkkoštannjuolggadusain.

Loga eambbo Ruoŧa mátkkoštannjuolggadusaid birra Ruoŧa politiijaid neahttasiiddus.

Suoma mátkkoštannjuolggadusat

Jus leat vuolgime mátkkoštit Norggas Supmii, de lea gáibádus ahte dus lea koronapássa mii muitala ahte leat ožžon guokte dahje golbma koronaboahku, dahje ahte dus lea leamaš koronadávda unnit go guđa mánu áigi. Dasa lassin gáibiduvvo ahte dus lea duođaštus mielde mii čájeha ahte leat váldán PCR- dahje jođánisiskosa iskkusstašuvnnas unnit go 48 diimmu ovdal go bohtet Suoma riikarádjái.

Vel lassin gáibida Suoma ráđđehus ahte buohkat geat bohtet Supmii dakkár riikkain gos lea ollu omikronvariánta-njoammun leat geatnegahtton čađahit dearvvašvuođaiskosa nu movt bohtet Supmi. Dat guoská earret eará norgalaččaide geat mátkkoštit Supmii. Lea vejolaš garvit geatnegahtton dearvvašvuođaiskosa Suomas jus dus lea duođaštus mielde mii čájeha ahte leat váldán koronaiskosa unnit go 48 diimmu ovdal bohtet Supmii.

Eai gusto mánáide ja nuoraide

Go leat golbma-vihtta beaivvi leamaš Suomas, de gáibiduvvo vel ahte válddát ođđa koronaiskosa.

Sii geain lea koronapássa eai dárbbaš erremii go bohtet Supmii, muhto Suoma ráđđehus ávžžuha ahte leat unnán lagasoktavuođat dassái go leat ožžon vástádusa koronaiskosis mii váldo golbma-vihtta beaivvi maŋŋel go leat boahtán supmii.

Láhkanjuolggadusat eai gusto mánáide ja nuoraide geat leat riegádan 2005:s dahje maŋŋel. Ođđajagemánu 1. beaivvi rájes eai gusto láhkanjuolggadusat mánáide ja nuoraide geat leat riegádan 2006:s dahje maŋŋel.

Ávžžuhuvvo maid ahte sisadieđihat iežat  Finentry.fi neahttasiiddus.

Jus galggat dušše Lappi buohccedikšubiirres leahkit dan botta go leat Suomas, de sisadieđihat iežat Laplandentry.fi neahttasiiddus.

Eambbo dieđuid Suoma mátkkoštannjuolggadusaid birra gávnnat Suoma rádjegozáhuslágádusa neahttasiiddus 

KORONAISKKUS: Koronaiskosa váldit lea šaddan okta dain váldonjuolggadusain maid ferte muitit go vuolgá mátkkoštit. Čájáhusgovva:Jil Yngland / NTB
KORONAISKKUS: Koronaiskosa váldit lea šaddan okta dain váldonjuolggadusain maid ferte muitit go vuolgá mátkkoštit. Čájáhusgovva:Jil Yngland / NTB

Lea lohpi vuodjit Suoma čađa

Jus it leat áigume idjadit Suomas, muhto áiggut vuodjit Suoma riikka čađa juogo njuolga Norgii dahje Ruŧŧii, de čilge Suoma Rádjegozáhuslágádus (Gränsbevakningsväsendet) njuolggadusaid ná:

– Jus leat vuodjime nu gohčoduvvon «transit», de fertet sáhttit čájehit koronapássa ja dokumeantta mii čájeha ahte leat koronaiskosa váldán iskkusstašuvnnas vuollel 48 diimmu ovdal, dadjá bargi Jukka Harmainen.

Go boađát ruoná dahje runtasivnnat guovllus

Go de leat jorggiheame ruoktot Norgii fas, de čilgejuvvojit njuolggadusat dáinna lágiin:

Jus boađát ruoná dahje runtasivnnat riikkas dahje guovllus, de gáibiduvvo ahte deavddát registrerenskovi neahttasiiddus entrynorway.no. Dán registrerenskovi galget maiddái badjel 16-jahkásaš nuorat deavdit.

Dál leat Ruoŧa leanat Gotland, Kronoberg, Norrbotten ja Västerbotten ruoná dahje runtasivnnat guovllut. Suomas ges Länsi-Pohja SVD, Mellersta Österbottens SVD, Norra Karelens SVD, Södra Savolax SVD, Vasa SVD, Östra Savolax SVD ja  Åland leat ruoná dahje runtasivnnat guovllut.

Jus don leat boahkuhuvvon dahje dus lea leamaš covid-19 dávda unnit go guđa mánu áigi, de galggat maid jođánisiskosa váldit iskkusstašuvnnas ovdal go lea mannan 24 diimmu dan rájes go bohtet Norgii.

Sihke mánát ja nuorat galget iskosa váldit iskkusstašuvnnas Norggas ovdal go lea mannan 24 diimmu dan rájes go bohte Norgii.

Go lea koronapássa, de ii dárbbaš erremii go boahtá Norgii.

Go boađát rukses guovllus

Jus leat leamaš rukses riikkas dahje guovllus, de leat seamma njuolggadusat go ruoná ja runtasivnnat guovllus. Dasa lassin ávžžuhuvvojit gaskal 16- ja 18-jahkásaččat váldit PCR-iskosa golbma beaivvi maŋŋel go leat boahtán Norgii.

Rukses guovllut Ruoŧas leat Blekinge, Dalarna, Gävleborg, Halland, Jämtland, Jönköping, Kalmar, Skåne, Stockholm, Södermanland, Uppsala, Värmland, Västra Götaland, Västernorrland, Örebro ja Östergötland.

Rukses guovllut Suomas leat Centrala Tavastlands SVD, Egentliga Finlands SVD, Helsingfors ja Nylands SVD, Kajanalands SVD, Kymmenedalens SVD, Lapplands SVD, Mellersta Finlands SVD, Norra Savolax SVD, Päijat-Häme SVD, Satakunta SVD, Syd-Österbottens SVD ja Södra Karelens SVD.

Njuolggadusat go ii leat koronapássa

Jus dus ii leat koronapássa, it leat boahkuhuvvon iige leat leamaš covid-19 dávda unnit go guđa mánu áigi, go boađát ruoná dahje runtasivnnat guovllus, de galggat deavdit registrerenskovi entrynorway neahttasiiddus ja váldit jođánisiskosa iskkusstašuvnnas Norggas ovdal lea mannan 24 diimmu dan rájes go bohtet Norgii.

Dasa lassin gáibiduvvo ahte dus lea duođaštus mielde ráji luhtte mii muitala ahte leat váldán koronaiskosa, juogo PCR iskosa dahje jođánisiskosa iskkusstašuvnnas, vuollel 24 diimmu ovdal go bohtet Norgga rádjái.

Jus boađát rukses guovllus, de gáibiduvvo vel ahte manat mátkkoštanerremii.

Eambbo dieđuid Norgga mátkkoštannjuolggadusaid birra sáhtát lohkat helsenorge.no neahttasiiddus.

-Almmuhus-