Dán lávvordaga hearvačálus lea sosiála mediaid birra.
Mu mielas lea somá dan áigge mátketelefuvnnain go sáhtát moatti boaluid duohken rievdadallat govaid iežat miela mielde ja measta makkár mokta lea, beaivvis beaivái. Nu de láven čuvggiidahttit iežan govaid nu ahte jávket buot unna ruoksadasat ja eará gobit ja bullit ámadajus. Lea dego nie movt háliidivččen leat sosiála medias ja beasan čiehkádallat dan gova duohkai. Eret dan duohtavuođa eallimis. Eallima luottat leat merken mu liikii, nu go earáid ge geat leat muhtin jagiid jo dulmmodan dan máilmmis.
Duo de ledjen rámbuvrras mohkki, ja oidnen oahpes olbmuid doppe, muhto orro nu čevlon buohkat, vaikke vel leat ge mu olbmát njeazzegirjjis. Ii hal lean buorre beaivi ge. In hal dainna gillen šat váivašuvvat. Jurddašallen ahte olbmuin dáidet iežaset bártit ja earánat maid dopmet čoavdit, eai ge astta «buorrebeaivvástallat». Na nu fal.
Muhto go rahpen dan njeazzegirjji moadde diimmu mannjel, de lei okta mu olbmáin doppe čállán iežas statusii ahte dan áigge ii šat dovdda olbmuid albma eallimis geaid láve oaidnit njeazzegirjjis, go sii leat rievdadallan iežaset govaid nu ollu, ja olbmot leat mealgat eanet nárvvagan duohtavuođas.
Na ii hal dalle dáidde imaš ge go olbmot eai šat dovdda nuppi earágo neahttagova bokte.
