Mađi boarrásit, dađi bivvileabbo. Nu lea Fjordkraft dulkon loguid maid ožžo iskkadeamis gieskat.
Mađi boarrásit, dađi bivvileabbo. Nu lea Fjordkraft dulkon loguid maid ožžo iskkadeamis gieskat.
Sáhttet olu ákkat dasa manne olmmoš galbmo, vaikko lea viesus. Buot čielgaseamos ágga sáhttá leat makkár temperatuvra lea viesus, ja movt leat gárvodan.
Muhtumat leat galmmežeappot go earát, ja dat sáhttá váikkuhit movt vástidat go soames riŋge jearrat lávet go galbmot dálvet, vaikko leat viesus.
Dan lea ge Fjordkraft energiijafitnodat bálkáhan Infact bargat. Sii leat riŋgen 1 500 olbmui jearrat juste dan. Vástádusat hirpmahuhtte, čállá Fjordkraft preassadieđáhusas.
Nuorat galbmojit eambbo
25 proseantta gaskal 18- ja 30-jahkásaš olbmuin lohket ahte galbmojit.
Dušše logi proseantta sis geat leat badjel 65 jagi boarrásat, lohket ahte galbmojit, ja 50 proseantta lohket ahte lea vuogas temperatuvra.
27 proseantta gaskal 18- ja 30-jahkásaččain leat duhtavaččat temperatuvrrain.
Eará sániiguin daddjon, de leat nuorat geat eai leat duhtavaččat temperatuvrrain mii lea viesus.
Olu ákkat
Fjordkraft gulahallandirektevra Jeanne Tjomsland jáhkká ahte leat olu ákkat manne leat nu stuora erohusat agis ahkái.
– In jáhke ahte lea dušše dat ággan ahte leat olu ásodagat gos bieggá. Dás leat olu ákkat, ja gárvodeapmi lea sihkkarit okta dain. Ii galgga gal oppastit, muhto lea hui dábálaš ahte nuorat geavahit soajehisbáiddiid ja unna suhkožiid, leaikkastallá Tjomsland.
Rávvagat jus galbmot
Jus leat okta sis guhte galbmot dálvet, de leat Tjomslandas moadde rávvaga.
– Dálvet ja čoaska áiggi lea buorre muddet man olu lieggasa anát alde, gos ja goas. Gaskamearálaš dállodoalus manná 60 proseantta el-rávdnji liggemii. Lea buorre ekonomalaš ráva jáddadit lieggasa dain lanjain gos it leat nu olu, dahje go manát bargui, dahje oađát.
– Jus lea boares viessu, ja lea galmmas, de ferte eambbo návccaid bidjat. Ođđasit skoađastit viesu, ja molsut lásiid soaitá divrras, muhto gánniha guhkit áigái.
– Lieggapumpa viežžá lieggasa olgun ja bossu dan vissui. Dat ii geavat nu ollu elrávnnji ge, go lieggaommanat.
– Jus bieggá uvssaid ja lásiid bokte, de sáhttá listet ođđasit.
Gárvodit bures
Tjomland rávve maid jurddašit movt gárvoda.
– Olbmot gal fertejit beassat gárvodit movt áigot, muhto lea divrras doalahit soajehisbáidetemperatuvrra birra jagi. Ullobáidi ja stohpogápmagat leat buorit jus dološmállet vuogi mielde áiggut bissut liekkasin, lohká son.
