Don dieđát ieš man boaris don leat. Muhto man boaris lea du rumaš? Dál beasat ieš iskat juste dan.
Don dieđát ieš man boaris don leat. Muhto man boaris lea du rumaš? Dál beasat ieš iskat juste dan.
Miessemánu 10. beaivvi lea máilmmi lášmmohallanbeaivi, ja Dearvvašvuođadirektoráhtta ja NTNU ávžžuhit olbmuid geahččalit iskosa mii ii leat nu duođalaš, muhto aŋkke hui deaivil, ja oaidnit lea go rupmašis seamma ahki go dus.
30 minuhta juohke beaivvi
Lášmmohallan lea áibbas dehálaš buori eallimis mas lea dearvvašvuohta ja eallinárvu. Eanaš norgalaččat eai lihkat doarvái beaivválaččat nu ahte návddašit buori bohtosa lášmmohallamis. Guovttis golmma olbmos eaba čuovo ávžžuhusa lihkadeapmái, mii lea 30 minuhta muttát lihkadeapmi juohke beaivvi.
– Lea hui vahát go nu stuora oassi álbmogis eai lihkat, lohká Dearvvašvuođadirektoráhta ossodatjođiheaddji Jakob Linhave.
Deaivilis bohtosat
– Dat gii muttágit lihkada, vuoitá golbma eallinjagi ja vihtta jagi buoret eallinárvvu go buohtastahttá olbmuin gii ii lášmmohala. Ollugat eai dieđe man unnán dárbbaša lihkadit, ja doivot ahte sii fertejit garrasit lášmmohallat. Lea okta ja seamma movt lihkadat, beare lasihat váibmocoahkkima veahá. Dat deháleamos aktivitehta lea dat maid čađahat, muitala Linhave.
NTNU dutkit leat ráhkadan álkes iskosa man juohkehaš sáhttá ieš váldit moatti minuhtas. Das čálát iežat agi, sohkabeali, allodaga, deattu, man olu váibmu coahkká go vuoiŋŋasta, ja man dávjá lávet lihkadit.
– Mihtidanreaidu, man dutkit leat ráhkadan, addá hui deaivilis bohtosiid go buohtastahttá dábálaš vuoibmeiskosiiguin. Soitet maid doavtterkantuvrrat sáhttit geavahit dán reaiddu oassin go kártejit pasieanttaid dearvvašvuođa, dadjá Linhave.
Soaitá fuomášit ieš
Neahttasiidduin sávvet dutkit addit olbmuide vejolašvuođa fuomášit ođđa beliid. Jus leat aktiiva, de sáhttá positiivvalaččat hirpmástuvvat. Jus ii lihkat ollu, de soaitá suorganit.
De hástaluvvot váldit iežat 30 minuhta juohke beaivvi, ja váldit iskosa mánu maŋŋel. Reaiddus leat rávvagat movt sáhtát lasihit lihkadeami.
– Ollugat hirpmástuvvet go oidnet man unnán dárbbaša lihkadit vai sirdá áiggi ruovttoluotta. Moadde lassituvrra vahkkus, tráhppá heaisa ovdalii, dahje moddii vahkkus finadit mánáiguin trampoliinnas njuikume, ja de oainnát bohtosiid, lohká Linhave.
Geahččal ieš: hvemereldst.no
