Leat go don dat geas nu lihkku ahte vuitet kiikara beassášlávvardaga heargevuodjingilvvuin Guovdageainnus? Duottar Hearggit searvi ohcá dál su geas lei 1306 bileahttanummar.
Duottar Hearggit doalai heargegilvovuodjimiid Guovdageainnus beassášlávvardaga, gos vuorbádedje vuoittuid bileahttanummariid vuođul. Vuoitun ledje iPadat ja kiikkar. Buot bileahttalihppuide dattege eai čállon namat, nu eai gávnna su guhte vuittii kiikara. Vuoitobileahta nummar lea 1306.
– Mun in leat ieš vuovdán bileahtaid nu ahte mun in dieđe manne namat eai leat čállon, muhto nu lea goit gártan ja lea dieđusge hui šállošahtti go eat leat gávdnan vuoiti, dadjá Duottar Herggiid jođiheaddji Aslak Sokki.
Divrras vuoitu
Kiikaris lea árvu birrasiid 7000 ruvnnu, ja jus dál gávdnoš vuoiti de Duottar Hearggit leat gergosat geiget dan vuoitái.
– Jus fuomášat ahte du bileahta nummar lea 1306 de berret váldit oktavuođa muinna ja de oaččot vuoittu, dadjá Sokki.
Vurdet Lotteriijabearráigeahčus ráđi
Searvi ii dieđe vuos maid dahket vuoittuin jus eai gávnna vuoiti.
– Mii leat váldán oktavuođa Lotteriijabearráigeahčuin ja vuordit sis vástádusa ahte maid galgat dahkat, čilge son.
Gilvvuin vuvddii searvi birrasiid 500 bileahta, go vuorbádedje vuitiid de ii lean iPad vuoiti ge báikki alde.
– Su gal leat gávdnan go su namma lei čállon lihppui, son hupmá eaŋgalasgiela. Kiikarvuoiti soaitá maid leat turista, dadjá Sokki ja sávvá vuoiti gávdnot.
– Lea hui šállošahtti go eat leat gávdnan kiikarvuoiti, deattuha son vel oktii.
