-Almmuhus-
OIDNON JA GULLONLeat bivdán eambbo dieđuid mánáid šearbma­geavaheami birra

Leat bivdán eambbo dieđuid mánáid šearbma­geavaheami birra

-

-

Maŋŋemus logi jagis leat measta buot mánát vuođđoskuvllas geavahišgoahtán juogalágan digitála ovttadaga.

Norgga Ráđđehusa ođđa lávdegoddi galgá guorahallat máhttovuođu ja evttohit doaibmabijuid mat leat čadnon mánáid ja nuoraid šearbmageavaheapmái, oađđimii, psyhkalaš dearvvašvuhtii ja oahppanhástalusaide.

Oahppodepartemeanta, Dearvvašvuođa- ja fuolahusdepartemeanta ja Mánáid- ja bearašdepartemeanta leat ovttas hábmen guorahallama ja lávdegotti čoahkkádusa mandáhta čielgá giđa mielde.

Norgga stádaministtar, Jonas Gahr Støre, oaivvilda dárbbu háhkat eambbo dieđuid makkár váikkuhusaid šearbmageavaheapmi ja ođđa teknologiija addá mánáid oahppamii, áicilvuhtii ja vuođđogálgamiidda.

– Dán áigge mánát deaividit digitaliseremiin ja ođđa teknologiijain buot arenain. Dat addá vejolašvuođaid, muhto maiddái hástalusaid maid birra mii fertet eambbo dieđuid oažžut, dadjá Gahr Støre preassadieđáhusas.

– Dárbu gávdnat balánssa

Máhttoministtar Tonje Brenna oaivvilda ahte go ovcci logi logejahkásaččas lea jierbmetelefovdna ja badjel 70 proseantta nuoraidskuvlaohppiin lea unnimusat golbma diimmu šearbmageavaheapmi beaivválaččat, de lea dárbu eambbo dieđuid dan birra oažžut. 

– Mii áigut bivdit lávdegotti iskat movt dat váikkuha min mánáid konsentreremii, oađđimii, psyhkalaš dearvvašvuhtii ja oahppamii. Mii dárbbašit daid dieđuid vai lea vejolaš buori balánssa gávdnat digitála ja analoga gaskkas. Min mánát galget ain oahppat čállit sihke giehtačállima ja boallobevddiin. Sii galget ain girjjiid lohkat, muhto maiddái oahppat digitála resurssaid geavahit buori ja oadjebas vuogi mielde, dadjá máhttoministtar Tonje Brenna.

-Almmuhus-