– Guovdageainnu buhcciidruovttu bargiid ovddas háliidan lohkat ahte Terje Horten lea árgabeaisáŋgár ja ánssaša juovlafuomašumi, lohká su bargoustit.
Ávvir lea bivdán lohkkiid sáddet evttohusaid geaidda galggašii addot veaháš fuomášupmi ovdal juovllaid. Mii ohcat olbmo gii buktá moji ja ilu, juogo bargosajis dahje astoáiggis. Mii ohcat árgabeaisáŋgáriid.
Guovdageainnu Buhcciidruovttu doaibmajođiheaddji, Marit Lovise Logje Malin, lea evttohan ahte Guovdageainnu dearvvašvuođaguovddáža viessohoiddár Terje Horten ánssáša oažžut juovlafuomášumi. Marit Lovise čállá ahte Terje lea álo buorremielas, mojunjálmmiid ja astá humádit olbmuiguin vaikko lea ge ollu bargu.
– Muhtomin boahtá mu lusa buhcciidruktui ja lohká ahte mii galggašeimmet dahje eat galggaše dahkat duon dán, muhto goitge lea unna mojáš go «váidala». Son dahká min dearvvašvuođaguovddáža bargiid bargobeivviid geahppaseabbon go lea veahkkái, ja go sus lea álki bivdit veahki. Son maid movttiida min boarrásiid ja buhcciid go humada singuin, ja maid go muhtomin buktá herskuid sidjiide, ákkastallá Marit Lovise Logje Malin.
– Guovdageainnu buhcciidruovttu bargiid ovddas háliidan lohkat ahte Terje Horten lea árgabeaisáŋgár ja ánssaša juovlafuomašumi, lasiha son.
– Ale dájo!
Ávvir deaivvada Terje Horteniin Guovdageainnu dearvvašvuođaguovddážis, hušaid siste lea jur aitto deavdilan gáffegohpu go mii boahtit.
Go Terje gullá ahte su bargoustibat leat evttohan ahte son galgá oažžut juovlafuomášumi, de jaskkoda álggos ovdal go dadjala:
– Ale dájo, ja moddjesta.
Go gullá ákkastallama maid Marit Lovise lea čállán, de bohkosa Terje ja dadjá ahte dat han lea su bargu.
– Gal mun duon vel árvidin ahte Marit Lovise dat lea sádden dien didjiide, mojohallá son.
Dábálaš juovllat
Terjes eai leat nu stuora plánat juovllaid, muitala gal ahte soaitá finadit Lulli-Norggas tuvrra ja ahte muđui gal šaddet juovllat nu go jo lávejit.
– Mun láven gáhkket iežan mánáide, ja doalvut sidjiide juovlagáhkuid. Lean unnivuođa rájes juo hárjánan gáhkket, hui liekkus bargu, mojohallá son.
– Marit Lovise čállá ahte don muhtomin buvttát herskkuid boarrásiidda ja buhcciide, lávet go daid maid ieš láibut ja gáhkket?
– In leat gáhkuid gal goassege buktán, muhto goikaduvvon lábbáčoarbbeali ja eará herskkuid, dasa gal boarrásat liikoje, mojohallá Terje Horten.
Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivččii juovlafuomášumi.
