– Lean sakka fuolastuvvan

– Lean sakka fuolastuvvan go Norga dál orru hilgumin vuđolaš ja deaŧalaš olmmošrievttálaš suodjalanmekanismmaid mat leat cieggan riikkaidgaskasaš álbmotriektái. Dat dagaha heajos beaggima álbmotriektái ja Norgii, oaivvilda Keskitalo Sámedikki preassadieđáhusas.

Moaitagat

ON allakomiseara báhtareddjiid várás Eurohpás, Pia Prytz Phiri, ja Helssetlávdegoddi leat moaitán čavgemiid Norgga báhtareaddji- ja dorvoohccipolitihkas. Keskitalo gávnnaha ahte maiddái Eurohpáráđi jođiheaddji, Torbjørn Jagland, dál lea váruhan ahte Norgga dorvoohcci- ja báhtareaddjipolitihkka sáhttá rihkkut Eurohpá olmmošvuoigatvuođaidkonvenšuvnna.

– Norga lea álo leamaš ovddimusas ovddidemiin ja atnui váldimiin vuđolaš olmmošvuoigatvuođaid, sihke siskkáldasat Norggas ja riikkaidgaskasaš servodagas. Dat mii dál dáhpáhuvvá, fuolastahttá mu sakka. Mu mielas ferte jearrat guđe eará álbmotrievttálaš standárddaid ráđđehus dál sáhttá gávnnahit buorrin rievdadit, dadjá Keskitalo.

Máilmmiviidosaš dorvofierpmádat

Son čujuha dán čavčča dálkkádatšiehtadallamiidda Parisas, gos Norgga ráđđehus loahpai atnui váldimis álgoálbmotvuoigatvuođaid dálkkádatšiehtadusa geatnegahtti oasis. Keskitalo deattuha ahte álbmotrievtti olmmošrievttálaš standárddat leat máilmmiviidosaš dorvofierpmádahkan máilmmi geahnoheamos álbmogiidda ja olbmuide.

– Mun vuorddán ahte ovddasmanni riika Norga árvvus atná sihke daid sániid ja áigumušaid mat bohtet ovdan min álbmotrievttálaš geatnegasvuođain. Jus Norga dan ii daga, de mii eat sáhte vuordit ahte eará riikkat dan dahket. Norga sáhttá boarskuduhttit deaŧalaš osiid dan álbmotrievttálaš ja olmmošrievttálsaš riikkaidgaskasaš barggus, mii lea dahkkojuvvon nuppi máilmmisoađi rájes, lohká Keskitalo.

Juohke ášši galgá meannuduvvot

Keskitalo lea dattetge čielggas das ahte eai buohkat geat dan háliidit, sáhte oažžut orruma Norggas, muhto son doalaha dan ahte juohkehaš galgá oažžut iežas ášši meannuduvvot riikkaidgaskasaš dorvoohcciinstituhta vuođul.