Vaino Rensberg
29 jagi
Plassjes eret, muhto ássá dál Kárášjogas
Vaino Renberg lea rádjame diŋggaid go vástida telefovnna. Son searvá buriin movttain gilvui.
– Dál lean Plassjes rádjame diŋggaid, galggan davás fas bijadit fargga. Mun gal searvvan gilvui, lean olles geasi čuvvon geassegilvvuid!
1. Goas ja gos lágiduvvo Olympia gilvvut maŋemus háve Norggas?
– 1994:s, Lillehammeris. Riekta
2. Galli báikkiin leat Ávvira kantuvrrat?
– Oi… Kárášjogas ja Guovdageainnus, guovtti báikkis. Boastut
Rievttes vástádus: 5 báikkis: Romssas, Kárášjogas , Deanus, Guovdageainnus ja Álttás
3. Gii lávllui “Mu lullanlávlla” lávlaga dán jagáš “Hver gang vi møtes” tv-ráiddus TV2:s?
– Agnete Saba. Riekta
Juohke gilvaleaddji beassá vel geahččalit vástidit ovtta árvádusa. Rukses ivnnat fáttá árvádusat leat váddáseamos ja jus dan máhttá, de oažžu 15 čuoggá. Alit ivnnat fáttá árvádusain oažžu 10 čuoggá ja ruoná fáttá árvádusain 5 čuoggá. Jurddašanáigi: 1 minuhtta.
– In mun láve nu jierbmái, haha! Ferten ruoná fáttá válljet, mas álkimus árvádusat.
Mun gulan buot, muhto in jietnat maidege. Mii lean mun?
– Diet lea álkimus árvádus go? Lea go beana? Dien in oba fuomáš ge. Boastut
Rievttes vástádus: Beallji
Dán vahkku loahpahuvvo Ávvira geassegilvu, danin ii beasa hástalit ođđa gilvaleaddji.
Čuoggát oktiibuot: 2
– Dál ferten gusto álgit muittahallat dábálaš máhtu fas, boagusta Vaino.
Njunnošis: Elle Márgget Nystad 22,5 čuoggáin
