Nu dat logai Sandra Lyng dan birrasiid 150 nurrii geat ledje boahtán mánáid- ja nuoraidkonsertii Kárášjoga valáštallanvistái odne. GEAHČA FILMMAID:
Nu dat logai Sandra Lyng dan birrasiid 150 nurrii geat ledje boahtán mánáid- ja nuoraidkonsertii Kárášjoga valáštallanvistái odne. GEAHČA FILMMAID:
Bivdu olgobáiki dat lágidii mánáid- ja nuoraidkonseartta Kárášjoga valáštallanvisttis odne. Konsearttas, mii bisttii badjelaš diimmu, čuojahedje Morgan Sulele, Innertier joavku ja Sandra Lyng.
Čuojahedje oahpes lávlagiid
Birrasiid 150 máná ja nuora ledje boahtán konsertii, man Morgan Sulele ja Innertier álggahedje. Sii čuojahedje iežaset dovddus šuoŋaid nugo «Lakenet», «Min kabin», «Si ja!».
– Buorit beassážat didjiide, lehpet go borran olu njálgáid, jearai Morgan Sulele ja guldaleaddjit gal maid vástidedje.
Sandra šarmerii
Buot guldaleaddjit dattege eai boahtán lávdde ovdii ovdal go Sandra Lyng lávkii dan ala. Sus ledje čeahpes čuojaheaddjit mielde ja lei ieš čeahppi hálahit guldaleddjiid.
Muhtin gánda gullui huikkádeamen artistii ahte muitá go su, go lei deaivan Sandra Norway Cupas.
– Ojá don dat leat ge, áigon ge juste lohkat ahte orrot nu čáppat, vástidii Sandra Lyng ja de jearralii vel:
– Manne bat nie ruvssodedje muođut?
Duđavaš lágideaddji
Lágideaddji Silvia Anette Siri gal logai iežas leat duhtavažžan konsearttain.
– Jua, lean hui duhtavaš ja mánát orro maid hui duhtavaččat, logai Siri maŋŋil konseartta.
Son dattege mieđihii ahte Isac Elliot konsearta mii lei Guovdageainnus odne, lei sidjiide gilvaleaddjin.
– Mii leimmet gal vuordán eambbo gehččiid, muhto go nu maŋŋit almmuheimmet dan nuoraidkonseartta de eai soaittá buohkat oba diehtan ge dan birra, lohká Siri.
– Erenoamáš vásáhus
Earret guldaleaddjiloguin, de lea vel juoga eará mii dáiddii earuhit dán konseartta Isac Elliot konsearttain, nammalassii dat ahte dán konsearttas ledje sullii seamma mađe gánddat go nieiddat, ja eatnašat ledje veahá boarrásat nuorat, nuoraidskuvllas bajás.
Okta guldaleddjiin lei Inga Laila Balto (15), guhte logai iežas liikon konsertii.
– Dat lei hui somá guldalit dáid, ii leat dábálaš ahte Kárášjogas lea konsearta mas leat dakkár stuorra násttit.
Inga Laila logai iežas gullan lávlagiid ovdal, muhto liikoi Sandra Lyngii buoremusat:
– Dat lea hui čeahppi ja dakkár lávlagat mat darvánit muitui.
Dál diibmu 22.00 rahppojit fas valáštallanvistti uvssat, dalle čuojahit seamma artisttat ges ollesolbmuide.
