-Almmuhus-
-Almmuhus-
KULTUVRA– Lean luksusdilis

– Lean luksusdilis

-

-

Našunálamusea lea oastán sápmelaš bivttashábmejeaddji Ramona Salo Myrseth biktasiid. 

Birtavárrilaš Ramona Salo Myrseth gárvii bivttashábmejeaddjeoahpus Oslo dáiddaallaskuvllas mannan giđa, ja dan rájes leamaš miehtebiekkas. 

Su eksámenkollekšuvdna «Sámi diibmobealli» bálkkašuvvui oainnat ođđajagemánus DOGA-bálk­kašumiin man juhket jahkásaččat muhtin norgalaš arkitektuvra- dahje designsuorggi easkaálgái.

Dál lea Našunálamusea oastán sus gárvvuid seamma kollekšuvnnas. 

– Lea issoras somá go leat oastán dáid gárvvuid. Go fuomášin ahte Našunálamusea láve oastit designbiktasiid, de sávven ahte galggašedje muinna váldit oktavuođa boahtteáiggis. Danin illudin sakka go dál jo riŋgejedje. Dát lea munnje stuora gudnin, dadjá Myrseth. 

 

Dáiddačájálmas ja čájáhus

Vaikke son lea aiddo álggahan iežas bivttashábmejeaddjekar­rieara, de lea jo vásihan lihkostuvvama.

Sus leat maiddái plánat ovddasguvlui. 

Ramona Salo Myrseth searvá vuos dáiddalaš ovttasbargui Katarina Skår Lisain.

Son galgá hábmet biktasiid «Gift of Stone» dáidda­čájálmassii mii čájehuvvo Várjjagis ja Oslos dán ja boahtte mánus.

Dasa lassin galgá Ramonas dáiddalaš bivttasčájáhus Akershus dáiddaguovddážis golggotmánus. 

– Dá lea luksusdilli aiddo­oahppan bivttashábmejeaddjái. Vásihan ahte olahan viidát sámevuođa fáttáiguin go olbmot beroš­tit das. Go čájehan iežan biktasiid, de vásihan maiddái ahte gaskkustan sámi kultuvrra. Dát lea munnje hui dehálaš ja mun háliidan sámi kultuvrra čájehit ođđaáigásaš konteavsttas, čilge son. 


Museagálvu: Dáid biktasiid lea Našunálamusea oastán sápmelaš bivttashábmejeaddjis. Dát gullet Ramona Salo Myrseth «Sámi diibmobeali» kollekšuvdnii.
Govven: Alberto Palladino

 

Ovdagovat

Ramona Salo Myrseth gaccai álggos bacheloroahpu kriminolo­giijas go fárrii oaivegávpogii.

– Go fárrejin Osloi, de fuomášin ahte sáhttá oahpu gazzat bivttashábmejeaddjin. Mus leamaš álo niehku hábmet biktasiid. Mánnán jo lávejin čoaggit govaid catwalkas ja bivttashábmejeaddjit dat ledje mu ovdagovat. In mun beroštan neavttáriin ja artisttain nu go earát. Gáivuonas eai lean gallis geain lei seamma beroštupmi go mus, nu ahte munnje rahpasii ođđa máilbmi oaivegávpogis, dadjá Ramona ja muittašišgoahtá mánnávuođa. 

– Mun ledjen udju mánnán ja nuorran, biktasiid bokte mun čájehin iežan identitehta. Mun háliidin veahá earálágan biktasiid ja molson bivttasmálliid dávjá. Láviime etniin čiŋahit ja rievdadit biktasiid maid osten buvddas. Ieš in oahppan goarrut ovdal go álgen designohppui. Muittán maid ahte lávejin hárjehallat boahtit catwalkii go mahkáš čurvejedje mu nama. Dien in máhtáše vel otná dan beaivvi, boagusta son. 

 

Sámevuohta dehálaš 

Ramona Salo Myrseth biktasat čalmmustahttet sámevuođa ja nu galgá maiddái boahtteáiggis.

– Vaikke ii oainne bohccuid dahje eará dábálaš sámi symbolaid mu biktasiin, de lea sámevuohta álo mu fárus go hábmen biktasiid. Kultuvra beroštahttá mu ja jáhkkimis šaddá dát maiddái dehálaš motamáilmmis boahtteáiggis, loahpaha son. 

-Almmuhus-