– Lean hirpmahuvvan go ná guhkás lean ollen, lohká Jon Henrik Fjällgren gii odne gilvala Ruoŧa Melodifestivalen loahppagilvvus.
Odne eahkes rohtteha Jon Henrik Fjällgren «Manne leam friije» luođi Ruoŧa oaivegávpogis, Melodifestivalen finálas. Doppe mearriduvvo oažžu go bileahta Wienii gos dán jagi lágiduvvo Eurovision Song Contest 2015 miessemánu loahpas.
John Henrik Fjällgren lohká iežas gealdagasas dál. Son sávvá ahte ollu sápmelaččat leat sálas odne.
– Eai mus leat stuorra vuordámušat vuoitit, lean jo vuoitán go lean beassan ná guhkás. In jáhke Ruoŧa vel lea gearggus luoitit luođi Eurovision Song Contestii, lohká son.
– Álgán dohkkehit luođi
Vaikko son lea ožžon sihke buori ja heajos fuomášumi dan rájes go šattai juoigamiin ná beakkánin, de Jon Henrik lohká gal iežas vuohttit ahte dál lea luohti eambbo dohkkehuvvon. Son doaivu ge iežas leamašan mielde váikkuheame dasa.
– Lean hirpmástuvvan go lean olahan ná guhkás, muhto jáhkán luođis lea dan mađe fápmu ahte juohkehaš dovdá rupmašii luođi. Beare olmmoš lea gearggus rahpat váimmu luohtái, de luohti olaha guhkás, lohká son.
– Guođđit visot heajos beliid
Luođis «Manne leam friije» leat sámegiel dajahusat ja lea dan birra maid juohke olmmoš sávvá, namalassii dovdat iežas friddjan:
– Guođđit visot heajus beliid mat dáhpáhuvvet eallimis. Sápmelaččat eai dovdda vel iežaset friddjan, ii sáhte vel lohkat ahte boazodoallu bistá agibeaivvi. Nu háliidan luđiin čalmmustahttit friddjavuođa.
Olu dáhpáhuvvan oanehis áiggis
Diibmá son luđiin vuittii Ruoŧa «Talang 2014», ja beakkehii viidát. Ollu lea dáhpáhuvvan dan rájes. Jon Henrik čilge ahte dat mii su mielas lea erohus searvat Melodifestivalen gilvui Talang gilvvuid ektui, lea ahte dál son áigu illudit.
– Ledje ollu dovddut diibmá, ledjen morrašis ja lei lossa áigodat mu eallimis. Dál áiggun illudit ja leat movttet go lean ollen ná guhkás!
Geahča video «Manne leam friije», mas oaččui liige fuomášumi go lea nuollan báiddi vel, dás:
